Isroilning G‘azo sektoriga hujumi va bombardimonlari ortib borishi haqidagi xavotirlar kuchaymoqda. Qo‘rquv bilan yashayotgan minglab falastinliklar o‘z uylarini tashlab, G‘azoning sharqidan g‘arbiy va janubiy hududlarga ko‘chib ketmoqda. Bu haqda Reuters agentligi xabar berdi.
Manbaga ko‘ra, Isroilning G‘azo shahrini to‘la nazoratga olish rejasi xorijda ham, mamlakat ichida ham xavotir uyg‘otgan. Isroilda o‘n minglab odamlar urush boshlanganidan beri kuzatilgan eng yirik norozilik namoyishlaridan birida qatnashib, janglarni tugatish va G‘azoda falastinliklar qo‘lida qolayotgan 50 nafar garovni ozod qilish bo‘yicha kelishuv tuzilishini talab qilishdi.
Misr va Qatar vositachilarni sulh yuzasidan harakatlarni jadallashtirishga undadi. Qohirada HAMAS ozodlik kuchlari bilan olib borilgan muzokaralarga yaqin manbaning aytishicha, bu tinchlik uchun oxirgi urinish bo‘lishi mumkin.
Isroil bosh vaziri Binyamin Netanyaxu G‘azo shahrini HAMAS ozodlik kuchlarining so‘nggi yirik tayanch punkti sifatida tasvirlagan. Isroil G‘azoning 75 foizini nazorat qilib turibdi. Harbiy hujumni kengaytirish garovdagilarni xavf ostiga qo‘yishi va askarlarni uzoq davom etadigan, qurbonlarga boy partizan urushiga tortishi mumkin.
G‘azo shahrida ko‘plab falastinliklar ham urushni tugatishni talab qilish va Isroilning quruqlikdagi hujumini oldini olish uchun HAMASni muzokaralarni kuchaytirishga undovchi namoyishlar o‘tkazishga chaqirmoqda.
Isroilning G‘azo shahriga bostirib kirishi yuz minglab odamlarning ko‘chirilishiga sabab bo‘lishi mumkin. Ularning ko‘pchiligi urush davomida bir necha bor uyidan quvg‘in qilingan.
Bayt Lahiya shahridagi boshpana rahbari Ahmad Mexeysanning so‘zlariga ko‘ra, so‘nggi kunlarda 995 ta oila G‘azoning janubiga yo‘l olgan. Mexeysanning ta’kidlashicha, favqulodda boshpana uchun 1,5 millionta chodir kerak. Biroq shu yilning yanvar–mart oylaridagi sulh doirasida Isroil G‘azoga 120 mingta chodir kiritilishiga ruxsat bergan, xolos. Birlashgan Millatlar Tashkilotining gumanitar idorasi G‘azoda 1,35 million kishi allaqachon favqulodda boshpana vositalariga muhtoj ekanini bildirgan.
“G‘azo shahridagi odamlar o‘lim jazosi chiqib, ijrosini kutayotgan kishiga o‘xshaydi. Men bugun yoki ertaga ota-onam va oilamni janubga ko‘chirmoqchiman. To‘satdan bosqin bo‘lsa, ularning birontasini yo‘qotish xavfini ko‘tara olmayman”, — degan G‘azo shahri tadbirkori Tomer Buray.
G‘azo shahrida turli kasaba uyushmalari norozilik namoyishi o‘tkazishni rejalashtirmoqda. Ijtimoiy tarmoqlarda ham odamlar qatnashishga va’da berishgan. Bu esa HAMASga nisbatan bosimni oshirishi mumkin. So‘nggi sulh muzokaralari iyul oxirida muvaffaqiyatsiz yakunlangan, tomonlar uning barbod bo‘lishida bir-birini ayblagan edi.
Manbaning xulosasiga ko‘ra, HAMAS vositachilarga AQSh taklif etgan 60 kunlik sulh va garovdagilarning yarmidan voz kechish yuzasidan muzokaralarni qayta boshlashga tayyor ekanini bildirgan. Shu bilan birga, ular urushni butunlay tugatadigan kengroq kelishuvni ham ko‘rib chiqish istagini bildirgan.
Izoh (0)