Yevroparlament deputatlari Anqaraga rasmiy tashrifi chog‘ida Yevropa komissiyasi rahbari Ursula fon der Lyayyenga (ayol kishi) Turkiya prezidenti Rajab Toyyib Erdo‘g‘on va Yevropa kengashi rahbari Sharl Mishel bilan bir qatorda kursi qo‘yilmagani bilan bog‘liq voqea yuzasidan norozilik bildirdi, deb yozadi “RIA Novosti”.
Yevrokomissiya rahbari diplomatik protokol ko‘ra ancha past darajali bo‘lgan tashqi ishlar vaziri Mavlud Chavusho‘g‘lining qarshisida, divanda o‘tirishga majbur bo‘ldi.
Yevroparlamentdagi sotsialistlar guruhi rahbari Garisiya Peres Irache fikricha, hodisa Anqaraning yaqinda ayollarni himoya qilish bo‘yicha Istanbul konvensiyasidan chiqqanini hisobga olganda, Turkiyada ayollarning diskriminatsiyasi bilan bog‘liq. “Dastlab ular Istanbul konvensiyasidan chiqdi, endi esa Yevropa komissiyasi raisini rasmiy tashrifi chog‘ida kursisiz qoldirmoqda. Bu uyat”, — deb yozdi deputat Twitter’da.
Yevroparlamentdagi belgiyalik deputat Tom Vandekendelare Twitter’da qayd etishicha, uning vatandoshi — Yevropa kengashi rahbari Sharl Mishel — Fon der Lyayyenga o‘z joyini bo‘shatib berishi yoki qabul qiluvchi tomondan joy bilan ta’minlashni so‘rashi mumkin edi.
Yevrokomissiya rasmiy vakili Erik Mamer 7-aprel kuni ma’lum qilishicha, Yevrokomissiya rahbari kelgusida xalqaro tashriflar chog‘ida bunday vaziyatlarga tushib qolmaslik uchun allaqachon o‘z jamoasiga zarur choralarni ko‘rishni buyurgan. Erik Mamerning so‘zlariga ko‘ra, Yevrokomissiyaning protokol xizmati koronavirus bilan bog‘liq cheklovlar tufayli shu gal safarda qatnashmagan edi.
Uning aniqlik kiritishicha, Fon der Lyayyen kursi bilan bog‘liq vaziyatdan hayratga tushgan, ammo “protokolga emas, masalaning mohiyatiga e’tibor qaratish”ni afzal bilgan. Shuningdek, uning aytishicha, “bu voqea muzokaralarga ta’sir o‘tkazmagan, Yevrokomissiya rahbari rejalashtirilgan barcha masalalarni muhokama qilishga muvaffaq bo‘lgan”.
Turkiya tashqi ishlar vaziri Mavlud Chavusho‘g‘li uchrashuvda o‘rindiq yetishmay qolishi bilan bog‘liq voqea yuzasidan mamlakatga nisbatan ayblovlarni adolatsiz deb atadi.
“Biz bu mavzu bo‘yicha hech qanaqa bayonet bermoqchi emasdik, ammo xorijda bu reaksiyani keltirib chiqarganini va Turkiyaga adolatsiz ayblovlar yog‘ilganini ko‘rdik. Biz chet ellik mehmonlarni birinchi marta qabul qilayotganimiz yo‘q va turklarning an’anaviy mehmondo‘stligi butun dunyoga mashhur. Bu uchrashuvda hamma narsa amaldagi xalqaro qoidalarga va odatiy protokolga muvofiq bo‘ldi. Har qanday uchrashuvdan oldin ikkala tomondan protokol xodimlari yig‘ilib, tafsilotlarni ishlab chiqadi”, — dedi Chavusho‘g‘li Anqarada jurnalistlarga.
Uning qo‘shimcha qilishicha, bu safar ham shunday bo‘lgan. “Biz narigi tomondan aytilgan barcha talablarni qondirdik”, — dedi Turkiya vaziri.
Shuningdek, Chavusho‘g‘li Twitter’da Italiya bosh vaziri Mario Dragining Turkiya prezidenti Rajab Toyyib Erdo‘g‘onni diktator deb atagani yuzasidan post qoldirdi. Dragi Fon der Lyayyenga o‘rindiq yetishmay qolgani bilan bog‘liq hodisada Turkiya tomonining xulqini xunuk deb atagandi.
“Komissiya raisi Ursula fon der Lyayyen boshidan o‘tkazgan kamsitishni ko‘rganimdan juda afsuslandim. Keling, ularni boricha diktator deb ataylik, ular bilan munosabatda fikrlarni haqqoniy ifoda etib, o‘z mamlakati manfaatlari yo‘lida hamkorlikka tayyor bo‘lish kerak”, — degandi Italiya bosh vaziri.
Shundan keyin Chavusho‘g‘li Twitter’da Dragining bayonotini nomaqbul va populistik deb atadi, Turkiya prezidenti haqidagi gaplarini esa yaramas va asossizga chiqardi.
Keyinroq Italiya elchisi Massimo Gayyani hodisa yuzasidan Turkiya tashqi ishlar vazirligiga chaqirilgani xabar berildi.
First they withdraw from the Istambul Convention and now they leave the President of European Commission without a seat in an official visit. Shameful. #WomensRights pic.twitter.com/p5Z4AHuHjK
— Iratxe García Pérez /❤️ (@IratxeGarper) April 6, 2021
Mavzuga doir:
Izoh (0)