Bishkek mezbonligida o‘tkazilgan “Zakovat” intellektual o‘yinining III Osiyo ochiq chempionati g‘oliblari ma’lum bo‘ldi. Ikki kun davom etgan bahslar hayajonli va emotsiyalarga to‘la ruhiyat bilan o‘tdi.
Turnirda O‘zbekiston, Qozog‘iston, Qirg‘iziston, Tojikiston va Rossiyadan kelgan bilimdonlar o‘z bilimlarini sinovdan o‘tkazishdi.
Turnirning asosiy bahsi — “Zakovat” o‘yinida 6 ta tur o‘tkazildi. Yakunda chempionlik Qozog‘istonning “Intellekt-ekipaj” jamoasi ga nasib qilib, III Osiyo ochiq chempionati kubogi hamda 100 million so‘m pul mukofotiga ega chiqishdi.
Ikkinchi o‘rinni hamda 60 million so‘mni “ONK” jamoasi o‘z hisobiga rasmiylashtirib qo‘ydi. Uchinchi o‘rin uchun qo‘yilgan 40 million so‘mni esa “Elizabet Perrish” jamoasi “ilib ketdi”.
Yana bir jamoaviy bahs “Brain ring” o‘yinining final bahsida Qozog‘istoning “ONK” jamoasi hamda O‘zbekistondan ishtirok etgan “Misteriya” jamoasi chempionlik uchun kuch sinashishdi. Yakunda chempionlik “ONK”ga, ikkinchi o‘rin esa vatandoshlarimizga nasib qildi. Uchinchi o‘rinlarning har ikkisi Qozog‘istondan kelgan “Intellekt-ekipaj” va “Brain Art” jamoalariga tegdi.
Shuningdek, turnirning “Shaxsiy o‘yin” yakkalik bahslarida “eng kuchli bilimdon” unvoniga rossiyalik Serafim Shibanov sazovor bo‘ldi. Ikkinchi o‘rinni Azat Turgunov va uchinchi o‘rinni Denis Galiakberov egalladi.
“Turnir haqidagi taassurotlar ajoyib! Ayniqsa, bu yerda faqat Qozog‘iston va O‘zbekiston emas, balki boshqa mamlakatlardan ham yoshlar yig‘ilganidan xursandmiz. Ko‘p yangi tanishuvlar, ajoyib tashkilot va muhit. Asosiy turnirni intiqlik bilan kutamiz va “Zakovat” harakatiga minnatdorlik bildiramiz!” — deya iliq fikrlarini aytib o‘tdi “ONK” jamoasi a’zosi Denis Galiakberov.
Barcha ishtirokchilar o‘zgacha hissiyotlarni hamda yangidan-yangi bilimlarni taqdim etayotgan turnir tashkilotchilariga o‘z minnatdorlik izhor qildi. Shuningdek, mezbonlar oldinda kutib turgan Zakovat Asian Cup II da ham bundan-da yuqori atmosfera bo‘lishiga ishonch bildirishmoqda.
Ma’lumot o‘rnida aytish kerakki, 20-avgust kuni Qirg‘iziston poytaxti yana bir muhim intellektual tadbir — Zakovat Asian Cup II ga ham mezbonlik qiladi. Ushbu tadbirda o‘zbekistonlik va qirg‘izistonlik bilimdonlar yana bir bor o‘zaro kuch sinashadilar.
Izoh (0)