Amerika Qo‘shma Shtatlari prezidenti Donald Tramp Rossiya yetakchisi Vladimir Putin bilan Alyaskada bo‘lib o‘tgan muzokaralarni to‘xtatish haqida o‘ylagan. Sababi Putin Ukrainaning besh hududi, jumladan Donetsk viloyati bo‘yicha maksimal talablarni ilgari surgan. Bu haqda Axios nashri xabar berdi.
Manbaga ko‘ra, 16-avgust kuni o‘tgan muzokaralarda Putin Rossiya Ukrainaning besh viloyati ustidan to‘liq nazorat o‘rnatishni istayotganini bildirgan.
Qayd etilishicha, Putin talablarida shunchalik murosasiz ko‘ringanki, Tramp muzokaralardan chiqishga tayyor bo‘lgan.
“Gap Donetsk viloyati haqida ketayotgan ekan, agar bu borada hech qanday murosa bo‘lmasa, unda muzokarani davom ettirishning ma’nosi yo‘q”, degan Tramp Putinga.
Nashr manbalarining ta’kidlashicha, Putin keyinchalik bu talabidan voz kechgan.
G‘arb matbuotiga ko‘ra, Vladimir Putin muzokaralarda Ukrainadan Donetsk va Lugansk viloyatlarini Rossiyaga berishni, Qrimni esa Rossiya hududi sifatida tan olishni talab qilgan. Bundan tashqari, u Zaporojye va Xerson viloyatlaridagi front chizig‘ini “muzlatib qo‘yish” tarafdori bo‘lgan.
Ukraina prezidenti Vladimir Zelenskiy esa Kiyev o‘z hududlarini Rossiyaga “sovg‘a qilish” niyatida emasligini ta’kidlagan.
Izoh (0)