Qahramonimiz Nodirabegim Musayeva bor-yo‘g‘i 23 yoshda, u Fond bozorining axborot resurs markazida birinchi darajali dasturchi bo‘lib ishlaydi. Olti tilda mustaqil so‘zlasholadigan dasturchi qizning muvaffaqiyat sirlari bilan qiziqdik.
“Shunchaki omadimni sinab talaba bo‘ldim”
— Ishga kirishimda ko‘p tillarni bilishim qo‘l keldi. Ona tilimdan tashqari, rus, ingliz, koreys, nemis va turk tillarini bilaman. Til o‘rganishni juda erta boshlaganman. Maktabni tamomlab, Toshkent davlat yuridik kollejiga o‘qishga kirganman. Yurist bo‘lish niyatim bo‘lgan, ammo ikkinchi kursda o‘qiyotganimda aniq fanlarga qiziqishim baland ekanligini anglaganman. Shunchaki omadimni sinash uchun xorijdagi institutlarga kirish uchun imtihon topshirganman. Janubiy Koreyadagi universitetlarning biriga grant asosida o‘qishga qabul qilinganman. Ammo hali kollejni tamomlamaganim va oilaviy sharoitimiz sabab bank hisob raqamimga 15 000 AQSH dollari miqdoridagi mablag‘ni depozit sifatida qo‘yolmaganman. Bundan tashqari, yosh bo‘lganligim uchun ota-onam ham xorijga o‘qitishga jo‘natishni istashmagan. Bu meni biroz tushkunlikka tushirgan.
“Grant-ku, hech narsa yo‘qotmayman”
— Kollejni tamomlab avgust oyida xorij universitetlarining O‘zbekistondagi filiallariga hujjat topshirganman. Ular orasida Toshkent shahridagi Turkiyaning Iqtisodiyot va texnologiyalar universiteti ham bor edi. Imtihonlar ikki bosqichda o‘tkazilgan, matematika va ingliz tilidagi bilimlarimizni sinovdan o‘tkazishgan. Ko‘p vaqt o‘tmay grant asosida o‘qishga qabul qilinganim haqida xabar kelgan. “Grant-ku, hech narsa yo‘qotmayman”, deb darslarga borganman. U yerdagi o‘qitish uslubi maʼqul kelgani uchun qiziqishim yana-da ortgan.
“Xorijlik ustozlar saboq berishdi”
— Men universitetga hujjat topshirgan vaqtim: “Xalqaro biznes va tadbirkorlik”, “Elektron tijorat va texnologiyalarni boshqarish” fakultetlari bor edi. Hozirda ular safi yanada ortib, arxitektura va sanoat muhandisligi fakultetlari ham ochilgan. Menimcha hozir tanlash imkoni bo‘lganida, aynan sanoat muhandisligi yo‘nalishida o‘qigan bo‘lardim.
Turk tilini o‘rganishimga universitetdagi darslar ham sabab bo‘ldi. Chunki darslar ingliz va turk tilllarida bo‘ladi. Pedagoglarning asosiy qismini xorijlik ustozlar tashkil etadi. Ikkinchi kursda turk tilini o‘rganganimiz, Turkiyaga borib o‘qishimizda juda qo‘l kelgan.
“Magistraturani Koreyada davom ettiraman”
— Hayotimda “Universitet talabani kuchli qiladi yoki sindiradi”, degan gap o‘z tasdig‘ini topdi. Men TOBB ETÜda o‘qib, kuchli inson va kadr bo‘lib yetishdim. Universitetni qizil diplom bilan tamomladim, bu magistraturaga grant asosida o‘qishga qabul qilinishimga katta yordam berdi. Janubiy Koreyaning top o‘ntalikka kiruvchi universitetida o‘qish imkoniyatiga ega bo‘ldim. Bu universitetga O‘zbekistondan to‘rt kishi hujjat topshirdik. Ular orasida aynan meni o‘qishga qabul qilishdi. Shu kunlarda robototexnikaga qiziqishim ortgan, balki bu sohada ham o‘qib, bilimimni oshirarman, deydi Nodirabegim Musayeva.
Izoh (0)