Gollivud yulduzlari butun dunyo ularni tanishidan ancha oldin eng g‘ayrioddiy kasblarda o‘zlarini sinab ko‘rgan. Ularning hikoyalari muvaffaqiyatga erishish yo‘li hech qachon oson bo‘lmasligini isbotlaydi. Quyida aktyorlarning shuhrat qozonishidan oldingi g‘ayrioddiy ish joylari haqida hikoya qilamiz.
Denni DeVito — sartarosh
Denni DeVito sartaroshlik kasbiga jiddiy yondashdi. U Uilfred sartaroshlik akademiyasini tamomlagan va o‘smirlik chog‘ida singlisi ochgan salonda ishlay boshlagan. Keyinchalik bu tajriba unga kinoda ham juda qo‘l kelganini aytdi. Doimiy ravishda odamlar bilan ishlash orqali bo‘lajak aktyor atrofdagilarni qanday qilib kuldirishni va dam olishga yordam berishni o‘rgandi.
1975-yil uning hayotida burilish nuqtasi bo‘ldi, o‘shanda DeVito Milosh Forman rejissyorligidagi “Kakku uyasi uzra parvoz” dramasida paydo bo‘ldi. Bu unga katta kinematografiya eshiklarini ochdi, u qora komediyadan tortib oilaviy kinogacha bo‘lgan turli janrlarda o‘zini aʼlo darajada namoyon qildi. Aktyor hatto “Jinoyatni fosh qilish” va boshqa hitlarni ishlab chiqargan o‘zining Jersey Films kompaniyasiga asos soldi.
Vupi Goldberg — morgdagi grimyor
Yoshligida Vupi Goldberg vizajist kasbini o‘rgangan. Malaka olgach, u go‘zallik saloniga ishga joylashishi mumkin edi, lekin negadir u Kaliforniya morgini afzal ko‘rdi. U yerda o‘liklarga dafn marosimlari uchun munosib ko‘rinish berdi: makiyaj qildi, sochlarini turmakladi.
Bir kuni u bilan haqiqatan ham dahshatli voqea sodir bo‘ldi. Boshliq Vupini “mustahkamlikda sinashga” qaror qildi. U jasadlar uchun mo‘ljallangan sovitkich qutisiga yashirindi va hech narsadan gumon qilmagan xodim oldida to‘satdan “tirildi”. Qiz qo‘rqib qochishga urindi, lekin yiqilib boshini qattiq urib oldi.
Ushbu voqeadan so‘ng Goldberg bu ishni tashladi va 1985-yilda Elis Uokerning “Binafsharang dala gullari” epik romanining ekranlashtirilgan filmida debyut qildi.
Harrison Ford — duradgor
Bo‘lajak Gollivud aktyori sakkiz yil davomida buyurtma asosida mebel yasadi. Shu bilan birga, u kinokastinglarga bordi va baʼzan kichik rollarni qo‘lga kiritishga muvaffaq bo‘ldi. Ulardan biri rejissyor Jorj Lukasning “Amerikalik graffitilar” filmi edi. Aynan shu filmdagi ijro ko‘p jihatdan taqdirni hal qiluvchi bo‘ldi — rejessyor Lukas xarizmatik duradgorni eslab qoldi.
Shunday qilib Gollivud afsonasi Harrison Ford paydo bo‘ldi. Ford kosmik kontrabandachi Xan Solo rolini o‘ynadi va sayyoradagi eng mashhur odamlardan biriga aylandi. Tirik afsona bo‘lgan Ford o‘sha yillardagi duradgorlik asboblarini hanuzgacha uyida saqlaydi.
Stiv Bushemi — o‘t o‘chiruvchi
Shahar tozalash xizmati xodimining oilasida o‘sgan Stiv Bushemi yoshligidan og‘ir mehnatning qadrini tushungan. 1980-yilda u eng xavfli kasblardan biri — o‘t o‘chiruvchilikni tanladi. To‘rt yil davomida yigit olovga qarshi kurashdi va insonlar hayotini qutqardi, keyin o‘z taqdirini keskin o‘zgartirishga qaror qildi.
Unga birinchi marta katta shuhrat “G‘azablangan itlar” filmi tufayli keldi. Kventin Tarantinoning olti nafar notanish qaroqchi haqidagi debyut filmida aktyor Janob Pushti rolida paydo bo‘ldi. Bu uning uchun haqiqiy yutuq bo‘ldi va uning qahramonining choy puli haqidagi monologi hanuzgacha eslanadi.
2001-yil 11-sentyabr teraktlaridan so‘ng Bushemi, allaqachon mashhur aktyor bo‘lgani holda, fojia oldidan shunchaki o‘tib keta olmadi. U o‘zining sobiq o‘t o‘chirish qismiga vayronalarni tozalash va bedarak yo‘qolganlarni qidirish uchun qaytib keldi. Bir necha yil o‘tgach, Bushemi yana o‘t o‘chiruvchi formasini kiyib oldi. Bu safar kino uchun — “Chak va Larri: o‘t o‘chiruvchilarning to‘yi” komediyasida rol ijro etdi.
Nikol Kidman — massajchi
Gollivud yulduzi Nikol Kidman bolaligidayoq sahnani orzu qilgan. Yoshligidan u balet bilan shug‘ullangan va maktab spektakllarida rol o‘ynagan. 15 yoshida u ekranda debyut qildi va “Bushdagi Rojdestvo” filmida suratga tushdi. Shundan so‘ng u o‘qishni ham, aktyorlikni ham keskin to‘xtatishga majbur bo‘ldi.
Qiz 17 yoshga to‘lganda, uning oilasi katta sinovga duch keldi — Kidmanning onasida saraton kasalligi aniqlandi. Yaqinlariga yordam berish uchun u tezlashtirilgan massaj kurslarida o‘qidi va shahar kasalxonasiga ishga kirdi. U deyarli tanaffussiz onasi va boshqa bemorlarga davolanishga yordam berdi.
Xayriyatki, onasining kasali yengillashdi va Nikol massajchilik kasbidan voz kechdi. U o‘qishga qaytdi va shuhrat tomon yangi yo‘llar ochildi. 2003-yilda u “Soatlar” filmidagi roli uchun “Oskar” mukofotiga sazovor bo‘ldi.
Kristofer Uoken — sherlar uchun dressirovkachi
Ushbu tanlovda eng xavfli ish bilan, shubhasiz, “Ustasi farang” filmida Katta Frenk Ebegneyl rolini ijro etgan Kristofer Uoken shug‘ullangan. Uokenni aktyorlik faoliyatiga bolaligidan tayyorlashgan. 10 yoshida u sahnada o‘ynagan, 16 yoshida esa Brodveyda to‘liq chiqish qila boshlagan.
Ammo shuhratga erishish yo‘lida uning kino bilan bog‘liq bo‘lmagan ishlari ham bor edi. Shunday qilib, 16 yoshida yigit o‘zini sirkda topdi. O‘smirlar uchun odatiy bo‘lgan shirin paxta sotish kabi vazifalar o‘rniga, uni haqiqatan ham ekstremal ish kutayotgan edi — sherlar dressirovkachisining yordamchisi lavozimi. Yoshligiga va tajribasizligiga qaramay, Uokenga sher bilan mustaqil chiqish qilish ishonib topshirildi, u har safar yirtqichning qafasiga kirganda hayotini xavf ostiga qo‘yar edi.
Sirkdan so‘ng Uoken musiqiy teatrlarda chiqish qila boshladi. U 1971-yil “Anderson tasmalari” filmida o‘z debyutini qildi. Yetti yil o‘tgach, “Kiyik ovchisi” harbiy dramasidagi roli unga shon-shuhrat keltirdi. Chimino kartinasidagi roli uchun Uoken “Oskar” mukofotiga sazovor bo‘ldi.
Adam Drayver — dengiz piyoda askari
Adam Drayver AQSH dengiz piyodalarida deyarli uch yil xizmat qildi. Uning o‘zini bunday qiyin ishga bag‘ishlash qaroriga 11-sentabr voqealari taʼsir ko‘rsatdi. Qo‘mondon uning sezilarli yutuqlariga ahamiyat berdi va uni Iroqqa jo‘natishga tayyorladi. Biroq, velosiped avtohalokatida olingan ko‘krak qafasi jarohati uning harbiy karyerasiga chek qo‘ydi.
Bu Drayverni bolalikdagi kino orzusiga qaytishga majbur qildi. Harbiylikdan so‘ng u qisqa vaqt ichida Indianapolisda o‘qidi. Keyin Nyu Yorkdagi Juilliard maktabining drama bo‘limiga o‘qishga kirdi.
Bunday nufuzli muassasani tugatgandan so‘ng, Drayver Brodveyda chiqish qila boshladi. Uning karyerasiga “Qizlar” serialidagi roli turtki bo‘ldi, u yerda Adam bosh qahramon Xannaning unutilmas sevgilisi obrazini yaratdi.
Qisqa vaqt ichida, aktyor o‘zini ko‘p qirrali ijrochi sifatida ko‘rsatishga muvaffaq bo‘ldi. U “Paterson” filmidagi avtobus haydovchisi va “Guchchi uyi” filmidagi ekssentrik Mauritsio obrazlari bn shuhrat qozondi.
Shu bilan birga, Drayver o‘zining harbiy o‘tmishini hech qachon unutmadi.
Gollivudda muvaffaqiyatga erishgach, u deyarli 20-yildan beri harbiy xizmatchilarni sanʼatga jalb qilishga yordam berib kelayotgan Qurolli kuchlardagi Sanʼat tashkilotiga asos soldi.
Izoh (0)