Голливуд юлдузлари бутун дунё уларни танишидан анча олдин энг ғайриоддий касбларда ўзларини синаб кўрган. Уларнинг ҳикоялари муваффақиятга эришиш йўли ҳеч қачон осон бўлмаслигини исботлайди. Қуйида актёрларнинг шуҳрат қозонишидан олдинги ғайриоддий иш жойлари ҳақида ҳикоя қиламиз.
Дэнни ДеVito — сартарош
Дэнни ДеVito сартарошлик касбига жиддий ёндашди. У Уилфред сартарошлик академиясини тамомлаган ва ўсмирлик чоғида синглиси очган салонда ишлай бошлаган. Кейинчалик бу тажриба унга кинода ҳам жуда қўл келганини айтди. Доимий равишда одамлар билан ишлаш орқали бўлажак актёр атрофдагиларни қандай қилиб кулдиришни ва дам олишга ёрдам беришни ўрганди.
1975 йил унинг ҳаётида бурилиш нуқтаси бўлди, ўшанда ДеVito Милош Форман режиссёрлигидаги “Какку уяси узра парвоз” драмасида пайдо бўлди. Бу унга катта кинематография эшикларини очди, у қора комедиядан тортиб оилавий киногача бўлган турли жанрларда ўзини аъло даражада намоён қилди. Актёр ҳатто “Жиноятни фош қилиш” ва бошқа ҳитларни ишлаб чиқарган ўзининг Жерсей Фильмс компаниясига асос солди.
Вупи Голдберг — моргдаги гримёр
Ёшлигида Вупи Голдберг визажист касбини ўрганган. Малака олгач, у гўзаллик салонига ишга жойлашиши мумкин эди, лекин негадир у Калифорния моргини афзал кўрди. У ерда ўликларга дафн маросимлари учун муносиб кўриниш берди: макияж қилди, сочларини турмаклади.
Бир куни у билан ҳақиқатан ҳам даҳшатли воқеа содир бўлди. Бошлиқ Вупини “мустаҳкамликда синашга” қарор қилди. У жасадлар учун мўлжалланган совиткич қутисига яширинди ва ҳеч нарсадан гумон қилмаган ходим олдида тўсатдан “тирилди”. Қиз қўрқиб қочишга уринди, лекин йиқилиб бошини қаттиқ уриб олди.
Ушбу воқеадан сўнг Голдберг бу ишни ташлади ва 1985 йилда Элис Уокернинг “Бинафшаранг дала гуллари” эпик романининг экранлаштирилган фильмида дебют қилди.
Ҳаррисон Форд — дурадгор
Бўлажак Голливуд актёри саккиз йил давомида буюртма асосида мебел ясади. Шу билан бирга, у кинокастингларга борди ва баъзан кичик ролларни қўлга киритишга муваффақ бўлди. Улардан бири режиссёр Жорж Лукаснинг “Америкалик граффитилар” фильми эди. Айнан шу фильмдаги ижро кўп жиҳатдан тақдирни ҳал қилувчи бўлди — режессёр Лукас харизматик дурадгорни эслаб қолди.
Шундай қилиб Голливуд афсонаси Ҳаррисон Форд пайдо бўлди. Форд космик контрабандачи Хан Соло ролини ўйнади ва сайёрадаги энг машҳур одамлардан бирига айланди. Тирик афсона бўлган Форд ўша йиллардаги дурадгорлик асбобларини ҳанузгача уйида сақлайди.
Стив Бушеми — ўт ўчирувчи
Шаҳар тозалаш хизмати ходимининг оиласида ўсган Стив Бушеми ёшлигидан оғир меҳнатнинг қадрини тушунган. 1980 йилда у энг хавфли касблардан бири — ўт ўчирувчиликни танлади. Тўрт йил давомида йигит оловга қарши курашди ва инсонлар ҳаётини қутқарди, кейин ўз тақдирини кескин ўзгартиришга қарор қилди.
Унга биринчи марта катта шуҳрат “Ғазабланган итлар” фильми туфайли келди. Квентин Тарантинонинг олти нафар нотаниш қароқчи ҳақидаги дебют фильмида актёр Жаноб Пушти ролида пайдо бўлди. Бу унинг учун ҳақиқий ютуқ бўлди ва унинг қаҳрамонининг чой пули ҳақидаги монологи ҳанузгача эсланади.
2001 йил 11 сентябрь терактларидан сўнг Бушеми, аллақачон машҳур актёр бўлгани ҳолда, фожиа олдидан шунчаки ўтиб кета олмади. У ўзининг собиқ ўт ўчириш қисмига вайроналарни тозалаш ва бедарак йўқолганларни қидириш учун қайтиб келди. Бир неча йил ўтгач, Бушеми яна ўт ўчирувчи формасини кийиб олди. Бу сафар кино учун — “Чак ва Ларри: ўт ўчирувчиларнинг тўйи” комедиясида рол ижро этди.
Никол Кидман — массажчи
Голливуд юлдузи Никол Кидман болалигидаёқ саҳнани орзу қилган. Ёшлигидан у балет билан шуғулланган ва мактаб спектаклларида рол ўйнаган. 15 ёшида у экранда дебют қилди ва “Бушдаги Рождество” фильмида суратга тушди. Шундан сўнг у ўқишни ҳам, актёрликни ҳам кескин тўхтатишга мажбур бўлди.
Қиз 17 ёшга тўлганда, унинг оиласи катта синовга дуч келди — Кидманнинг онасида саратон касаллиги аниқланди. Яқинларига ёрдам бериш учун у тезлаштирилган массаж курсларида ўқиди ва шаҳар касалхонасига ишга кирди. У деярли танаффуссиз онаси ва бошқа беморларга даволанишга ёрдам берди.
Хайриятки, онасининг касали енгиллашди ва Никол массажчилик касбидан воз кечди. У ўқишга қайтди ва шуҳрат томон янги йўллар очилди. 2003 йилда у “Соатлар” фильмидаги роли учун “Оскар” мукофотига сазовор бўлди.
Кристофер Уокен — шерлар учун дрессировкачи
Ушбу танловда энг хавфли иш билан, шубҳасиз, “Устаси фаранг” фильмида Катта Фрэнк Эбегнейл ролини ижро этган Кристофер Уокен шуғулланган. Уокенни актёрлик фаолиятига болалигидан тайёрлашган. 10 ёшида у саҳнада ўйнаган, 16 ёшида эса Бродвейда тўлиқ чиқиш қила бошлаган.
Аммо шуҳратга эришиш йўлида унинг кино билан боғлиқ бўлмаган ишлари ҳам бор эди. Шундай қилиб, 16 ёшида йигит ўзини циркда топди. Ўсмирлар учун одатий бўлган ширин пахта сотиш каби вазифалар ўрнига, уни ҳақиқатан ҳам экстремал иш кутаётган эди — шерлар дрессировкачисининг ёрдамчиси лавозими. Ёшлигига ва тажрибасизлигига қарамай, Уокенга шер билан мустақил чиқиш қилиш ишониб топширилди, у ҳар сафар йиртқичнинг қафасига кирганда ҳаётини хавф остига қўяр эди.
Циркдан сўнг Уокен мусиқий театрларда чиқиш қила бошлади. У 1971 йил “Андерсон тасмалари” фильмида ўз дебютини қилди. Етти йил ўтгач, “Кийик овчиси” ҳарбий драмасидаги роли унга шон-шуҳрат келтирди. Чимино картинасидаги роли учун Уокен “Оскар” мукофотига сазовор бўлди.
Адам Драйвер — денгиз пиёда аскари
Адам Драйвер АҚШ денгиз пиёдаларида деярли уч йил хизмат қилди. Унинг ўзини бундай қийин ишга бағишлаш қарорига 11-сентябрь воқеалари таъсир кўрсатди. Қўмондон унинг сезиларли ютуқларига аҳамият берди ва уни Ироққа жўнатишга тайёрлади. Бироқ, велосипед автоҳалокатида олинган кўкрак қафаси жароҳати унинг ҳарбий карьерасига чек қўйди.
Бу Драйверни болаликдаги кино орзусига қайтишга мажбур қилди. Ҳарбийликдан сўнг у қисқа вақт ичида Индианаполисда ўқиди. Кейин Нью Йоркдаги Жуиллиард мактабининг драма бўлимига ўқишга кирди.
Бундай нуфузли муассасани тугатгандан сўнг, Драйвер Бродвейда чиқиш қила бошлади. Унинг карьерасига “Қизлар” сериалидаги роли туртки бўлди, у ерда Адам бош қаҳрамон Ханнанинг унутилмас севгилиси образини яратди.
Қисқа вақт ичида, актёр ўзини кўп қиррали ижрочи сифатида кўрсатишга муваффақ бўлди. У “Патерсон” фильмидаги автобус ҳайдовчиси ва “Гуччи уйи” фильмидаги эксцентрик Маурицио образлари бн шуҳрат қозонди.
Шу билан бирга, Драйвер ўзининг ҳарбий ўтмишини ҳеч қачон унутмади.
Голливудда муваффақиятга эришгач, у деярли 20 йилдан бери ҳарбий хизматчиларни санъатга жалб қилишга ёрдам бериб келаётган Қуролли кучлардаги Санъат ташкилотига асос солди.
Изоҳ (0)