Оилавий кечалар унутилмас бўлишининг энг яхши усулларидан бири фарзандлар билан бирга яхши фильм томоша қилишдир. Бундай вақтни мазмунли ўтказиш, болалар билан янги мавзуларда суҳбат қуриш ҳамда уларга янги сабоқ бериш учун қуйида биз тўплаган фильмлар ёрдам беради.
“Том Сойер”
Марк Твеннинг “Том Сойернинг саргузаштлари” романи 2026 йилда нашр этилганига 150 йил тўлади. Дунё ва замон узоқ вақт давомида кескин ўзгариб кетганига қарамай, асар ҳануз долзарблигини йўқотмаган. Асардаги бош қаҳрамонлар тахминан 10–12 ёшли ўсмирлар — Том Сойер ва Гек Финн. Улар электрон гаджетсиз, болаларга хос саргузаштларга тўла ҳаёт кечиради.
Бугунги кун мезонларига кўра, фильмдаги айрим саҳналар, масалан, болани савалаш кадрлари бугунги тарбия тамойилларига мос келмаслиги мумкин. Аммо бу орқали Том ҳар доим бажарган ишлари учун жавобгарликни ўз зиммасига олиши кўрсатилади. Бу эса замонавий болаларда етишмайдиган муҳим жиҳатлардан биридир.
“Том Сойернинг саргузаштлари” турли мамлакатларда бир неча бор экранлаштирилган, масалан, рус киноси ишқибозлари учун 1981 йилда суратга олинган уч қисмли фильм (бош ролларда Фёдор Стуков ва Владислав Галкин)ни тавсия этиш мумкин. Америка фильмларини ёқтирувчилар эса 1973 йилда суратга олинган версияни томоша қилишлари мумкин. Шунингдек, 2011 йилда Германияда ишланган фильм ҳам бор. Унда Том ролини ёш актёр Луис Хофманн гавдалантирган.
“Энни”
“Энни” мусиқий фильмининг бош қаҳрамони ўн ёшли қизалоқ бўлиб, у спиртли ичимликка муккасидан кетган мисс Ханниган (Камерон Диас ижросида) бошчилигидаги болалар уйида тарбияланади. Энни ҳақиқий ота-онасини топиш умидида яшайди, аммо тақдир уни Нью Йорк мери лавозимига номзод бўлган Уилл Стакс (Жейми Фокс) билан учраштиради. Стакс қизалоқни машина уриб кетишидан сўнгги дақиқада қутқариб қолган видео интернетда тарқалади. Унинг жамоаси Энни орқали PR кампания ўтказмоқчи бўлади, аммо қувноқ ва шўх қизалоқ Энни уларнинг ҳаётини буткул ўзгартириб юборади.
“Терабития мамлакати сари”
Габор Чупонинг “Терабитияга мамлакати сари” номли фантастик драмаси бешинчи синф ўқувчиси Жесс Аарон ҳақида ҳикоя қилади. У камгап, тортинчоқ бола. Жесснинг на дўстлари бор, на бирор қизиқиши. У ота-онаси билан ҳам яхши тил топишмайди. Бир куни у қўшни қиз Лесли (Анна-София Робб) билан танишади ва улар дўст тутинади. Биргаликда улар “Терабития” деб номланган сеҳрли оламни кашф қилади. Бу дунё уларнинг ҳақиқий ҳаётдаги ҳиссиётларини акс эттиради. Аммо Леслининг кутилмаган ўлими бу гўзал эртакка якун ясайди. Шунга қарамай, Жесс бу дўстлик орқали анча улғаяди ва характерини ўзгартиради.
“Улғайган”
1988 йилда режиссёр Пенни Маршалл томонидан суратга олинган “Улғайган” фильми ажойиб оилавий драмадир. Бош ролни актёр Том Ҳенкс ижро этган. Бу роли учун у “Олтин глобус” мукофотига сазовор бўлган, шунингдек, “Оскар” номинациясини ҳам қўлга киритган.
Фильмда 13 ёшли Жошуа Баскин тезроқ катта бўлишни орзу қилади ва эртаси куни уйғонганида ўзини 30 ёшли эркак танасида топади. Унинг катталарга хос ҳаёти ёмон бўлмайди: Жошуа ўйинчоқлар ишлаб чиқарадиган компанияда ишлайди, яхши маош олади, ҳашаматли квартирада яшайди. Аммо унинг қалби ҳануз болалик соғинчи билан тўлиб-тошади.
“Менинг қаттиққўл энагам”
Актриса, режиссёр ва ссенарист Эмма Томпсон “Менинг қаттиққўл энагам” фильмининг сценарийси устида тўққиз йил давомида ишлаган ва унда бош ролни ўзи ижро этган. 2005 йилда экранларга чиққан фильм яхши даромад кўрган ва танқидчилар томонидан илиқ кутиб олинган. Шу сабабли беш йилдан сўнг унинг иккинчи қисми ҳам суратга олинган.
Воқеалар Виктория давридаги Англияда кечади. Фильм марказида ўз рафиқасидан ажралган жаноб Браун (Колин Фирт) ва унинг етти нафар ниҳоятда шўх фарзандлари туради. Болалар устидан назоратни йўқотган Браун уйига бирданига энага МакФи таклиф этилади. У болаларнинг ўжарлигини ижобий энергияга айлантира олади.
Изоҳ (0)