Бухоро вилоятида бир ойлик чақалоғини 10 миллион сўмга сотмоқчи бўлган онага суд ҳукми ўқилди. Бу ҳақда Олий суд хабар берди.
Фото: “Дарё” / Мадина Нурман
Аниқланишича, фуқаро Н.К. 2024 йил июнь ойида Туркияга ишлаш мақсадида бориб, августда Ўзбекистонга қайтган ва шу ойда фарзанд кўрган. Орадан кўп ўтмай, яна хорижга чиқиш ниятида бўлган аёл чақалоғини сотишга қарор қилган.
2024 йил 4 сентябрь куни ички ишлар ва давлат хавфсизлик хизмати ходимлари ўтказган тезкор тадбир давомида Н.К. фарзандини 10 миллион сўмга сотаётган вақтида қўлга олинган. У воқеа жойида ёзма тилхат ёзиб берган, пул далил сифатида расмийлаштирилган.
Суд жараёнида аёлнинг айби барча ҳужжатлар — экспертиза хулосалари, овоз ёзувлари, гувоҳлар кўрсатмаси ва бошқа далиллар билан тўлиқ исботланган.
Суд ҳукмига кўра, Н.К. Жиноят кодексининг 135-моддаси 3-қисми “а” банди бўйича айбли деб топилиб, унга 3 йил 6 ой муддатга озодликдан маҳрум қилиш жазоси тайинланди.
Бундан олдин Тошкент вилоятида бир ёшли ўғлини 9 минг долларга сотишга уринган эр-хотинга суд ҳукми ўқилгани, Самарқандда аёл уй олиш учун 6 ёшли ўғлини 6 минг долларга сотмоқчи бўлганида қўлга олингани ҳамда Навоийда фарзандини 85 миллион сўмга сотишга уринган эр-хотин жиноят устида қўлга олингани ҳақида хабар берилганди.
Изоҳ (0)