Apple ва Google аккаунтларидан 16 млрд парол интернетга тарқалди, деб хабар берди Forbes.
Маълум қилинишича, тадқиқотчилар томонидан бугунга қадар кўрилмаган маълумотлар сизиб чиқиш ҳолати аниқланди. Бунинг натижасида турли машҳур хизматлар (Apple, Google, Facebook, Telegram ва бошқалар) ҳамда давлат платформаларидаги аккаунтларнинг 16 миллиардга яқин логин ва пароллардан очиқ фойдаланиш имконияти пайдо бўлган.
Айрим мутахассислар бу ҳодисани тарихдаги энг йирик маълумот сизиб чиқиши деб баҳоламоқда. Барча онлайн аккаунтлар паролларини дарҳол ўзгартириш ва имкон қадар кўп босқичли ҳимояни фаоллаштириш қатъий тавсия этилмоқда.
Бу нима дегани?
16 миллиард турли платформалардан олинган, шахсий аккаунтларга тегишли логин ва пароллар оммавий равишда интернетда ёки dark web’да тарқалган бўлиши мумкин. Улар орасида Apple ID, Google аккаунтлари, ижтимоий тармоқлар, банк аккаунтлари, электрон почталар, ва бошқа турли веб-сайтлардаги аккаунтлар ҳам мавжуд бўлиши мумкин.
Қандай хавфлар бор?
1. Аккаунт ўғирланиши (hacking)
- Агар сизнинг паролингиз ҳам тарқалган бўлса, кимдир сиздан олдин аккаунтингизга киради.
2. Fishing ва фирибгарлик
- Киберҳужумчилар сизнинг номингиздан бошқаларга ёзиши, ёки шахсий маълумотларингизни сўраб, алдаши мумкин.
3. Молиявий йўқотишлар
- Google Pay, Apple Pay, онлайн банк, PayPal ва шунга ўхшаш хизматларга уланган ҳисоблар орқали пул ечиб олиниши мумкин.
4. Шахсий маълумотлар тарқалиши
- Сизнинг шахсий суратларингиз, хавфсиз маълумотларингиз, электрон хатларингиз ҳам чиқиб кетиши мумкин.
Нима қилиш керак?
- Паролингизни дарҳол алмаштиринг
- Икки босқичли аутентификация қўлланг
- Қийин, узун ва турли белги, рақам, катта ва кичик ҳарфлардан иборат пароллар тузинг.
Изоҳ (0)