Янги вирус минглаб Apple гаджетларини зарарлаётгани хабар қилинди

Palo Alto Networks кибер-хавфсизлик компанияси WireLuker деб номланган, «тарихдаги энг кенг қамровли» вирус Apple гаджетларига ҳужум қилаётганини эълон қилди. Бу ҳақда LookAtMe маълумотига асосланиб «Пароль» нашри хабар берди.

Бу вирус Хитойнинг Maiyadi номли дастурлар дўконидан тарқалмоқда. Бунда нафақат вирус билан зарарланган қурилма эгалари, балки бошқалар ҳам зарар кўради. Мутахассисларнинг сўзларига кўра, ушбу вирус деярли исталган маълумотни (улар орасида тўлов ҳам мавжуд) ўғирлай олади.

Вирус Mac компьютерларининг 400 та дастурини зарарлашга улгурган. Бу дастурлар эса Maiyadi дўкони орқали 350 000 мартадан кўпроқ юклаб олинган. Зарарланган компьютерга USB орқали смартфон ёки планшет уланса, уларга ҳам WireLuker вируси ўтади. Вирус юз минглаб Apple қурилмаларини зарарлаши тахмин қилинмоқда.

WireLuker вирусининг яратилишидан якуний мақсад нима эканлиги ҳозирча номаълум. Вирусни яратганлар уни ҳозирда синовдан ўтказаётгандек кўринишмоқда.

Apple компанияси WireLuker вируси ҳақида бирор маълумот келтиргани йўқ. Palo Alto Networks ходимлари эса Apple фойдаланувчиларини лицензиясиз дастурларни ўрнатмаслик ва оммабоп бўлмаган компанияларнинг USB-қувватлагичларидан фойдаланмасликни тавсия қилмоқда.

Шунингдек, «Пароль» нашрида қуйидаги мақолаларни ҳам ўқишингиз мумкин:

• Google ва Apple муҳандислари смайликларни янада турли хил қилиш устида ишламоқда;
• Янги Google Nexus 9 планшети батареясининг қуввати энг узоққа етадиган деб топилди;
• Apple Watch ақлли соати 14 февраль куни 500 дан 5000 долларгача нархда сотила бошланиши мумкин.