Skype асосчиларидан бири Янус Фриис ва MSN Messenger’ини ишлаб чиқишда иштирок этган Жонатан Кристенсен биргаликда Wire деб номланаган янги лаҳзалик хабар алмашиш мессенжерини тақдим этишди. Бу ҳақда TechCrunch хабар берди, деб ёзади «Пароль» нашри.
Ушбу дастур Android, iOS ва Mac компьютерлари учун мўлжалланган. Уни ишлаб чиқишда Apple, Skype, Nokia ва Microsoft мутахассислари иштирок этган. Дастур сайтида ёзилишича, тез орада бошқа компьютерлар учун ҳам Wire’нинг веб-версияси тақдим этилади.
«Skype бундан ўн йил олдин тақдим этилган, ундан хабар алмашиш, бепул қўнғироқлар учун фойдаландик. Skype’да бир қанча ўзгаришлар амалга оширилди. Ҳозирда компьютерни чўнтагимизда олиб юришимиз ҳам мумкин. Ҳозир эса энг яхши хабар алмашиш воситасини ишлаб чиқишнинг айни пайти, у ҳам чиройли, ҳам фойдали бўлиши зарур. Wire мессенжери эса айнан шунинг ўзи» — дейди лойиҳа асосчиси Янус Фриис.
Wire лаҳзалик хабар алмашиш мессенжери бепул бўлиб, уни Google Play ва iTunes онлайн дўконларидан юклаб олсангиз бўлади.