Еврокомиссия Google қидирув тизимини ўз ичига олган Alphabet компаниясига Европа иттифоқининг рақамли бозорида рақобат қоидаларини мунтазам равишда бузаётгани тўғрисида огоҳлантириш юборди. Бу ҳақда Комиссия матбуот хизматининг хабарида айтилган.
Еврокомиссиянинг дастлабки хулосасига кўра, Google қидирув тизими рақобатчилар олдидаги устунлигидан фойдаланиб, Alphabet компаниясининг ўз хизматларини илгари сурмоқда. “Бу Европа иттифоқининг Рақамли бозорлар тўғрисидаги қонуни талаб қилганидек, учинчи томон хизматларига шаффоф, адолатли ва камситишсиз муносабатни таъминламайди”, дейилади ҳужжатда.
Бундан ташқари, Еврокомиссия фикрига кўра, Google Play интернет-дўкони ҳам Европа қоидаларини бузиб, учинчи томон иловаларини ишлаб чиқувчиларнинг фойдаланувчиларни янада фойдали таклифлар билан муқобил ҳаволага йўналтириш имкониятларини чеклайди. Шунингдек, ЕК Google’ни мижозларни топишда ёрдам бергани учун ишлаб чиқувчилардан ҳаддан ташқари юқори ҳақ олишда айбламоқда.
Alphabet компаниясига Еврокомиссия даъволари билан танишиш ва тегишли изоҳлар бериш имконияти берилди. Агар бу изоҳлар ЕКни қаноатлантирмаса, у ҳолда Европа қоидаларини бузганлиги учун компанияга қарши чоралар кўрилиши мумкин.
Рақамли бозорлар тўғрисидаги қонун (Digital Маркец Аcт, ДМА) 2022 йил 1 ноябрда кучга кирган ва Европа иттифоқида 2023 йил майидан бошлаб қўлланила бошланган. Ушбу қонун “рақамли сектор бозорларини янада адолатли ва рақобатбардош қилиш”га, сўнгги фойдаланувчиларга кўпроқ танлов ва эркинлик беришга қаратилган. Кейинчалик Еврокомиссия Alphabet, Амазон, Apple, ByteDance, Meta, Microsoft, Х тармоғи каби бир қатор компанияларни энг йирик онлайн платформалар сифатида белгилаган. Бу компаниялар Еврокомиссиянинг тўғридан-тўғри назорати остига олинган.
Комиссия ушбу компанияларнинг DMА доирасидаги мажбуриятларини самарали бажаришини кузатиб бориши ҳақида огоҳлантирди. Компания мажбуриятларга риоя қилмаган тақдирда ЕК унга ўтган молиявий йилдаги умумий жаҳон айланмасининг 10 фоизигача, такроран бузилган тақдирда эса 20 фоизигача миқдорда жарима солиши мумкин. Мунтазам қоидабузарликлар содир этилган тақдирда эса, Еврокомиссия қўшимча ҳуқуқий чоралар кўради, ҳатто қоидабузар компанияни Европа иттифоқидаги бизнесини сотишга мажбур қилувчи қарор қабул қилишгача бориб етиши мумкин.
Изоҳ (0)