Канада ҳукумати АҚШнинг Канада, АҚШ ва Мексика ўртасидаги келишувга (CUSMА) кирмайдиган товарларга 35 фоизлик янги савдо божларини жорий этиш қароридан кўнгли қолди. Бу ҳақда Канада бош вазири Марк Карни идораси маълум қилди.
Канада ўз миллий манфаатларини ҳимоя қилиш, жумладан, зарар кўрган тармоқларни қўллаб-қувватлаш, экспорт бозорларини хилма-хил қилиш ва ички ишлаб чиқаришни кучайтириш бўйича чоралар кўришга тайёрлигини билдирган.
“Канада дунёдаги энг йирик эркин савдо битимларидан бири бўлган CUSMА’га содиқ қолмоқда”, дея таъкидланади баёнотда.
Шунингдек, бош вазир идораси АҚШнинг янги савдо чекловларини фентанилнинг чегаралараро айланмаси билан боғлашга уринишларига муносабат билдирган. Маълумотларга кўра, АҚШга фентанил импортида Канаданинг улуши 1 фоиздан камни ташкил этади. Шу билан бирга, мамлакат аллақачон чегара хавфсизлигини мустаҳкамлаш, хусусан, ҳаво кузатувини кенгайтириш, чегара назоратини кучайтириш, шунингдек, ушбу соҳада янги қонунчиликни жорий этиш бўйича муҳим қадамлар қўймоқда.
Карнининг таъкидлашича, ҳукумат асосий эътиборни ички иқтисодий ўсишга ва вилоятлар, ҳудудлар ҳамда туб аҳоли билан биргаликда кенг кўламли инвестиция лойиҳаларини амалга оширишга қаратади. Унинг сўзларига кўра, бу чора-тадбирлар 500 миллиард доллардан ортиқ сармояни жалб қилиши ва минглаб янги иш ўринларини яратиши мумкин.
CUSMА (Канада-Америка Қўшма Штатлари-Мексика келишуви), шунингдек, АҚШда USMCА ва Мексикада Т-MEC номи билан ҳам танилган, 2020 йил июль ойида NАFТА (Шимолий Америка эркин савдо келишуви) ўрнини эгаллаган эркин савдо шартномасидир. CUSMА Канада ва АҚШ ўртасидаги икки томонлама савдонинг 98 фоиздан ортиғи ва 99,9 фоиздан ортиғи учун божсиз режимни таъминлайди.
АҚШ президенти Дональд Трамп Канада учун тарифларни 25 фоиздан 35 фоизга ошириш тўғрисидаги фармонни имзолади. Таъкидланишича, Трампнинг ҳаракатлари Канаданинг “фентанилнинг давом этаётган оқимини тўхтатишда ҳамкорлик қилишдан” бош тортишига, шунингдек, АҚШга қарши “президентнинг ушбу ғайриоддий ва фавқулодда таҳдидни бартараф этиш бўйича ҳаракатлари учун” кўрилган жавоб чораларига жавобан амалга оширилган.
Изоҳ (0)