Apple хато туфайли тақдимотдан олдин янги iPad планшетларининг суратини эълон қилиб юборди

Apple компанияси бугун, 16 октябрь куни бўлиб ўтадиган тадбиридан олдин ноодатий, қўпол хатога йўл қўйди. Компания янги iPad Air 2 ва iPad mini 3 планшетларининг суратларини хато туфайли тақдимотдан олдин эълон қилиб юборди. Бу ҳақда The Verge маълумотига асосланиб «Пароль» нашри хабар берди.

Янги iPad планшетларида iOS 8 операцион тизимидан фойдаланишнинг расмий йўриқномаси суратлари iTunes Store’да пайдо бўлди. Суратнинг сифатли тури эса ҳали ҳам Apple серверларида сақланиб турибди.

Йўриқномада ҳали тақдим этилмаган iPad Air 2 ва iPad mini 3 планшетларининг суратлари мавжуд. Уларнинг ҳар иккаласида ҳам TouchID — бармоқ изи сенсори ўрнатилган. Таъкидлаб ўтиш жоиз, ушбу гаджетлардан аввал ишлаб чиқарилган Apple планшетларида TouchID функцияси йўқ эди.

Янги iPad планшетлари аввалгилари билан бир хил дизайнда. Шунингдек, йўриқномадан кўриш мумкинки, iPad Air 2 планшетида Burst Mode — серияли суратга олиш функцияси мавжуд, аммо iPad mini 3’да ҳам ушбу функция бўлиши ҳақида маълумот берилмаган.

Эслатиб ўтамиз, бугун Apple’нинг расман тасдиқланган тадбири бўлиб ўтади. Унда илк тилла рангли iPad планшетлари, Retina дисплейли iMac компьютерлари ва Mac компьютерлари учун мўлжаланган OS X операцион тизимининг янги версияси тақдим этилиши кутилмоқда.

Шунингдек, 15 октябрь куни Google компанияси Android’нинг янги Lollipop версияси ҳамда Nexus 6 смартфони ва Nexus 9 планшетларини расман тақдим этди.