Android асосчиларидан бири Google’даги ишидан бўшади

Google’нинг Android лойиҳаси асосчиларидан бири Энди Рубин компаниядаги фаолиятини якунлади. Бу ҳақда The Verge маълумотига асосланиб «Пароль» нашри хабар берди.

Рубин технология стартаплари учун инкубатор яратиш мақсадида Google’дан кетди. У компаниянинг робототехника йўналишида раҳбар эди. Эндиликда унинг ўрнини Google’да тадқиқотчи олим бўлиб фаолият олиб борадиган Жеймс Куфнер эгаллайди.

Энди Рубин 2005 йилда Google’нинг Android лойиҳасига қўшилган. Ўтган йиллар давомида у ушбу лойиҳани дунёдаги энг оммабоп операцион тизим даражасига олиб чиқиш учун катта ёрдам берди. Унинг Google’дан кетиши кутилган янгилик бўлиши ҳам мумкин. Чунки, у март ойида Android жамоасини тарк этган ва унинг ўрнига Сундар Пичай тайинланган эди.

Google раҳбари Ларри Пейж Энди Рубиннинг кейинги ишларида омад тилаб, миллиарддан ортиқ фойдаланувчиларга эга Android операцион тизими учун унга ўз миннатдорчилигини билдирди.

Шунингдек, «Пароль» нашрида қуйидаги мақолаларни ўқишингиз мумкин:

• HP компанияси проекторли клавиатурага эга Sprout компьютерини тақдим этди (фото);
• Собиқ Google ходими «келажаги бор» тўлов терминалини ишлаб чиқарди (фото);
• Apple компаниясининг 534 та маҳсулоти тасвирланган плакат сотувга чиқарилди.