Андижон вилоятида 59 миллион сўмлик алиментни тўламай юрган фуқаро МИБ ходимлари томонидан ноодатий услубда ушланди. Бу ҳақда 1 август куни Мажбурий ижро бюросининг Андижон вилояти бошқармаси хабар берди.
Эркак икки йилдан бери вояга етмаган фарзандларига алимент тўламаётгани сабаб қидирувда бўлган. Ушбу даврда унинг қарздорлик миқдори 59 миллион сўмга етган.
Маълум қилинишича, МИБ ходимлари айбланувчини тутиш учун “махсус учрашув” уюштирган.
“МИБ ходимлари қиз бола номидан Telegram мессенжерида эркак билан романтик ёзишмалар бошлаган. Қарздор кафега таклиф қилинган. Алиментчи ота “учрашув”га келган вақтда қўлга олинган”, дейилади хабарда.
Кутилмаган учрашув ортидан алиментчи ота жавобгарликка тортилган.
Маълумот учун, 2024 йил ноябрда Аюбхон Алимов МИБ Андижон вилоят бошқармаси бошлиғи лавозимига тайинланганди.
Изоҳ (0)