Хитойнинг шарқий қисмидаги Шандун вилоятида жойлашган кимё заводида портлаш содир бўлди. Портлаш оқибатларини бартараф этиш учун 232 нафар қутқарувчи ва 55 та техника воситалари сафарбар этилди. Бу ҳақда Хитой марказий телевидениеси маълум қилди.
Маълум қилинишича, 27 май куни тахминан соат 11:57 да Shandong Gaomi Youdao Chemical Co.,Ltd. корхонасининг цехида портлаш юз берган. Ҳозирги вақтда одамларни қутқариш ва тиббий ёрдам кўрсатиш бўйича барча зарур чоралар кўрилмоқда.
Таъкидланишича, ҳодиса тўғрисидаги маълумотни олгач, ХХР фавқулодда вазиятлар вазири Ван Сянси чоралар кўриб, ёнғинни тезда ўчириш учун мутахассис кучларни жалб этиш, тергов ва қидирув-қутқарув ишларини олиб бориш, шунингдек, жабрланганларни даволаш учун тиббиёт мутахассисларини йўналтириш бўйича кўрсатмалар берган.
“Маҳаллий ёнғин-қутқарув гуруҳи вазиятни барқарорлаштириш учун ҳодиса жойига 55 та техника воситаси ва 232 нафар ходимни йўллади”, дейилади хабарда.
Ҳозирча, жабрланган кишилар сони ҳақида маълумот берилмаган. Ҳокимият органлари ярадор бўлганларга тиббий ёрдам кўрсатиш учун шифокорлар фаолиятини мувофиқлаштирмоқда.
Ижтимоий тармоқларда портлаш оқибатлари эълон қилинди. Тасвирларда ҳодиса жойи устида қуюқ тўқ кулранг тутундан иборат баланд устун пайдо бўлгани кўринади. Завод атрофидаги бинолар шикастланган.
Маълумотларга кўра, заводда 500 дан ортиқ ишчи меҳнат қилади. Корхона йилига 11 минг тоннадан зиёд хлорпирифос (ҳашаротларга қарши кураш воситаси) ишлаб чиқаради.
Изоҳ (0)