Гўзаллик ва ўзига бўлган ишонч кўплаб инсонлар учун муҳим аҳамиятга эга. Бироқ баъзида бу истак инсонларни ўзининг табиий кўринишидан узоқлаштириб, экстремал чоралар кўришига олиб келади.
Хитойлик блогер қиз Чжоу Чун ўзида юздан ортиқ пластик жарроҳлик амалиётлари ўтказгани бунинг яққол мисолидир. У TikTok’даги макияж ёки рақс видеолари билан эмас, балки кўплаб операцияларни ўтказгани ҳамда барча ўзгаришларни обуначилари билан бўлишиб келгани билан машҳур.
Чжоу Чуна 2001 йилда туғилган ва илк бор 13 ёшида жарроҳлик столига ётган. У Хитойнинг Weibo ижтимоий тармоғида ўз операциялари ҳақида очиқчасига маълумот беради, олдинги ва кейинги суратларни жойлаштириб боради.
Унинг биринчи операцияси блефаропластика — қовоқдаги ортиқча тери, ёғ ёки мушак тўқималари олиб ташланадиган жарроҳлик амалиёти бўлган. Қизнинг назарида унинг барча синфдошлари аллақачон “европача кўзлар” билан юргани учун гўзал, у эса хунук кўринишда қолиб кетган эди.
Чжоу айдол (барча ҳурмат қиладиган ва тақлид қиладиган машҳур персонаж)ларнинг катта-катта кўзлари, ўткир бурунлари ва аниме қаҳрамонларидагидек қиррали жағлари билан ўзини таққослар эди. Айниқса, у Хитой актрисаси Эстер Юга ўхшашни жуда истар эди. У дорамаларда Эстерни кўриб: “Мана шундай кўринишда бўлишим керак, ана ўшанда мени яхши кўришади”, деб ўйларди.
Чжоу ота-онасидан операция учун ёрдам сўради, улар эса қизини бу ишдан қайтариш ўрнига уни қўллаб-қувватлашди. Онаси: “Агар чиройли бўлишни истасанг, буни иложи борича эртароқ бошлаш керак”, деди.
Уларнинг оиласи бадавлат бўлгани учун пул билан боғлиқ муаммо йўқ эди. Чжоу ота-онасига шарт қўйди: ё қиз мактабни ташлаб кетади, ёки кўзини операция қилдиради. Ота-она операцияни танлашди. Чжоу бу ҳақда эслаб шундай дейди:
“Қовоқ олдириш операциясидан кейин синфдошларим менга нисбатан яхшироқ муносабатда бўла бошлади ва мен пластик жарроҳликнинг ширин таъмини татиб кўрган эдим”.
Кейин эса йиллар давомида узлуксиз операциялар бошланди: ринопластика, ёноқларни чиқариш, пешонани тортиш, лабларни шишириш, қошларни ўзгартириш... Чжоуда жағ шакли уч марта ўзгарган, чунки биринчи операциядан кейин унинг даҳан қисми “жуда ўткир” бўлиб қолган эди, иккинчисидан кейин эса “етарлича анимега ўхшамасди”. Бундай амалиётлардан унинг юзи қаттиқ оғриган, овқат еёлмаган, аммо Чжоу камерага табассум қилиб: “Мен мукаммаллик томон кетяпман”, деб дадил айтган.
Бир неча йил ичида у юздан ортиқ операцияни бошидан ўтказди. Умумий харажат 4 миллион юандан ошган, бу тахминан 650 минг АҚШ долларига тенг. Онаси буларнинг барчасини тўлаб борган. Улар Пекин, Шанхай ва Сеулдаги энг яхши клиникаларга мурожаат қилган.
16 ёшга келиб Чжоу Чун минглаб обуначилар ва миллионлаб лайклар билан машҳур блогер ва инфлюенсерга айланди. Фойдаланувчилар унга мақтовлар ёзишар, кўринишини идеал деб аташар, дорамалардаги қаҳрамонларга қиёслашар ва унинг ташқи кўринишига қойил қолишарди. Кўпчилик уни “тирик Барби” деб атарди. Аммо бу образ ортида кўплаб муаммолар бор эди.
Реал ҳаёт интернетдан тубдан фарқ қилар эди. 2020 йилда пандемия сабабли кўпчилик уйда ўтирган пайтда Чжоу 20 марта жарроҳларга мурожаат қилган. Аввалига қизнинг хотирасида муаммолар бошланди, сўнг доимий оғриқлар, шиш ва кўкаришлар безовта қила бошлади. Унинг териси шу даражада таъсирчан бўлиб қолган эдики, Чжоу ёнбошлаб ухлай олмасди.
“Мен ҳеч қачон ўзимнинг ташқи кўринишимдан қониқмайман. Ҳар доим навбатдаги операциядан кейин яхшироқ кўринаман деб ўйлайман. Ҳатто овқат ва сувдан воз кечишга ҳам тайёрман, лекин пластик жарроҳликсиз яшай олмайман. Мен жарроҳлар касбини ҳурмат қиламан ва наркозга қарши эмасман. Чунки оғриқлардан эмас, балки одамлар кўз ўнгида хунук кўринишдан қўрқаман”, дейди у.
Энг даҳшатли томони шундаки, Чжоу ҳали ҳам ўзини “етарлича чиройли эмас” деб ҳисоблайди. У фотосуратларини ижтимоий тармоққа юклашдан аввал доимо монтаж қилади.
Ачинарлиси, Хитойда Чжоу Чун каби минглаб қизлар бор. Улар шунчаки чиройли бўлишни истамайди, балки мажбур эканликларини ҳис қилади, чунки мамлакатда гўзаллик салонлари турли инфлюенсерлар орқали кенг реклама қилинади: “Қаранг, у қандай ўзгарди”, “Сиз ҳам уддалай оласиз”, деган сўзлар ҳар қадамда янграйди.
Хитойда пластик жарроҳлик бозори алоҳида саноатга айланган. Йилига 20 миллиондан ортиқ марта ўтказиладиган муолажаларнинг 80 фоизи 25 ёшгача бўлган ёш қизларни ташкил қилади. Клиникалар орасида рақобат жуда кучли.
Чжоу ҳозир 24 ёшда. У вақтини ўқиш, карьера қуриш, саёҳат қилишга сарфлаётган бўлиши мумкин эди, аммо эндиликда операциядан қолган асоратларни даволаш билан кун кечирмоқда.
Изоҳ (0)