АҚШ Миллий Ядро хавфсизлиги бошқармаси Украинага ядро қуроли ёки “ифлос бомба”дан кўтарилувчи радиацияни сезадиган, шунингдек, ҳужум манбасини аниқлай оладиган датчиклар етказиб бермоқда, деб ёзади The New York Times.
Ускуналарни етказиб беришдан мақсад — агар Россия Украина ҳудудида ядро қуролидан фойдаланишга қарор қилса, Москванинг ҳужумга алоқадорлигини тасдиқловчи далилларни қўлга киритиш.
Радиация датчикларини ўрнатиш, ходимларни ўқитиш ва тўпланадиган маълумотларни кузатиб бориш махсус Ядро фавқулодда ёрдам гуруҳининг (NESТ) ядро мутахассислари томонидан амалга оширилади. Гуруҳ матбуот котибининг NYT’га айтишича, датчиклар тармоғи “бутун минтақа бўйлаб” жойлаштирилмоқда, улар “ҳар қандай ядровий портлаш кўлами, жойлашуви ва оқибатларини тавсифлаш” имкониятига эга бўлади ва Россиянинг “Украинада ядро қуролидан фойдаланишга алоқамиз йўқ” деган даъволарининг олдини олади.
Экспертларнинг фикрича, ушбу турдаги мудофаа режасини оммага ошкор қилиш Россияни ядродан фойдаланишда Киевнинг ўзини айблашга уринадиган “сохта байроқ операцияси”ни режалаштиришдан қайтариши мумкин.
Украинада кенг кўламли уруш бошланганидан бери Россия президенти Владимир Путин ядро қуролидан фойдаланиш эҳтимолига бир неча бор шама қилди. Сентябрь ойида у ушбу мавзудаги баёнотлари пўписа эмаслигини таъкидлади. Аммо кейинроқ у Россиянинг Украинага ядровий зарба беришидан “ҳеч қандай маъно йўқ”лигини айтди.
2022 йил октябрь ойида Россия мудофаа вазири Сергей Шойгу ва Россия қуролли кучлари Бош штаби бошлиғи Валерий Герасимов АҚШ, Буюк Британия, Хитой ва бошқа давлатларга Украина гўёки “ифлос бомба” ёрдамида провокация тайёрлаётганини маълум қилган эди. Кейинчалик Украина ҳудудида текширув ўтказган МАGATE россиялик ҳарбийларнинг даъволарини тасдиқлайдиган ҳеч қандай далил топмади.
2023 йил март ойи охирида Владимир Путин Россия Беларусда тактик ядро қуролларини жойлаштиришини эълон қилди. Кейинроқ Дмитрий Медведев агар мамлакатнинг мавжудлигига таҳдид бўлса, Россия расмийлари биринчи бўлиб ядро қуролидан фойдаланиши мумкинлиги таъкидлади.
Изоҳ (0)