Нима томоша қилишни билмаяпсизми? 2025 йилнинг биринчи ярмида экранларга чиққан ва сизга албатта ёқадиган энг кассабоп фильмлар рўйхатини тақдим этамиз.
“Нечжа аждарлар шоҳини мағлуб этади”
“Нечжа аждарлар шоҳини мағлуб этади” мультфильми касса йиғимлари бўйича рекорд ўрнатиб, 2 миллиард доллардан ошиб кетди. Сюжет марказида жасур бола Нечжа ва унинг дўсти Ао Бин туради. Улар аждарлар шоҳи ва унинг қўшинига қарши курашади, аммо уларга чақмоқ урилади ва қаҳрамонлар руҳларга айланади. Уста Тайи Чженжен Етти рангли муқаддас нилуфар билан ёрдамга келади, лекин Нечжа ва Ао Бин қайтиб келиб, аждарлар уруғини тўхтата оладими?
“Майнкрафт кинода”
Апрель ойида экранларга чиққан “Майнкрафт кинода” фантастик саргузашт комедияси ҳам омадли чиқди. Маълумотларга кўра, лойиҳа Голливудда энг кўп талаб қилинган лойиҳалардан бирига айланиб, жаҳон прокатида 550 миллион доллар даромад келтирган.
Сюжетга кўра, Гаррет Гаррисон, Генри, Натали ва Доун — фақат тасаввурда мавжуд бўлган ғалати кубсимон мўжизалар оламига тушиб қолишади. Уйга қайтиш учун улар ёвуз чўчқалар ва зомбиларга қарши курашишлари, шунингдек, уста Стив билан бирга сеҳрли вазифани бажаришлари керак бўлади.
“Чайнатаунлик детектив, 1900 йил”
Чайнатаунда бир аёлга суиқасд уюштирилади, асосий гумонланувчи эса хитойлик эди. Бу жиноят катта шов-шувга сабаб бўлади ва шаҳар аҳолиси Хитой маҳалласини ёпишни талаб қилади. Ишни анъанавий хитой табобати шифокори Син Фу ва А-Гуй лақабли хитой-ҳинд овчиси суриштира бошлайди.
Ушбу комедия кўплаб томошабинларга, айниқса, хитойлик мухлисларга манзур бўлди. Хитойда фильм намойишнинг дастлабки беш кунида 253,1 миллион доллар даромад қилиб, иккинчи ўринни эгаллади.
“Яшинчақнатарлар”
Marvel’нинг яна бир фильми “Яшинчақнатарлар” касса рекордини янгилади. Май ойи бошидаги маълумотларга кўра, фильм даромади 162 миллион долларга етди.
Сюжетга кўра, Марказий разведка бошқармаси раҳбари Валентина Аллегра де Фонтейн антиқаҳрамонлар ва супер ёвузлардан иборат жамоа тузади. Улар энг хавфли топшириқларга тайёр бўлиб, ҳукумат буйруғига кўра ишлайди. Улар орасида жосус Елена Белова, Қизил Қўриқчи, Баки Барнс, Таскмастер, шунингдек, АҚШ Агенти номи билан машҳур Жон Уокер бор.
“Оппоғой”
Бу фантастик мюзикл премерадан олдин танқидга учраганди. Кўпчиликни бош ролни ижро этувчи актриса Рейчел Зеглер, шунингдек, сюжетдаги ўзгаришлар ва асл классик асарга ёндашиш тарзи қониқтирмаган. Бироқ айнан шу омиллар томошабинларнинг “Оппоғой”га бўлган қизиқишини янада оширган бўлиши мумкин. Натижада лойиҳа касса йиғимида муваффақиятли деб топилди — унинг жаҳон кинопрокатидаги даромади 204,1 миллион долларни ташкил этди.
Умуман олганда, асосий сюжет ғояси ўзгармаган: ёш малика Оппоғой ўзининг гўзаллигига ҳасад қиладиган ёвуз жодугар ўгай онасидан қочиб, етти гном яшайдиган уйчага яширинади.
“Уста”
Жейсон Стетем бош ролни ижро этган мазкур фильмнинг бутун дунё бўйича касса йиғими 98 миллион доллардан ошиб кетди.
Левон Кейд қурилишда оддий ишчи. Аммо қурилиш раҳбари қизини номаълум шахслар ўғирлаб кетишганда айнан унга мурожаат қилади. Ана энди ниқобларни ечиб ташлаш ва яширин маҳоратни намоён қилиш пайти келди.
“Капитан Америка: янги дунё”
“Капитан Америка: янги дунё” фантастик жангари фильми шу йилнинг февраль ойида экранларга чиқди. У 2025 йилнинг дастлабки уч ойидаги энг муваффақиятли фильмлардан бирига айланди ва уч ҳафталик намойишдан сўнг бутун дунё бўйлаб 370 миллион доллардан ортиқ даромад келтирди. Шундан 40 миллион доллари лойиҳанинг АҚШдаги премера кунидаёқ йиғилди — бу 2025 йилдаги рекорд кўрсаткич бўлди.
Сюжетга кўра, штатларнинг янги президенти Таддеус Росс Капитан Американи расмий лавозимга тайинлашга қарор қилади. Ўтмишда улар ўртасида келишмовчиликлар бўлгани учун Сем бу яхши ғоя эканлигига шубҳа қилади. Айни шу куни президентга суиқасд уюштирилади. Уилсон хоин Росснинг энг яқин атрофида яширинганига ишонч ҳосил қилади.
Изоҳ (0)