АҚШ давлат котиби Энтони Блинкен Мюнхен хавфсизлик конференциясида Хитой ва Ҳиндистон ташқи ишлар вазирлари билан Россиянинг коинотда ядро қуролини жойлаштириш эҳтимолини муҳокама қилди, шунингдек, уларни Москвага таъсир ўтказишга чақирган. Бу ҳақда Тhе New York Times хабар берди.
Унга кўра, АҚШ давлат котиби айнан Хитой ва Ҳиндистон етакчилари Си Цзиньпин ва Нарендра Моди Владимир Путинни “фалокатга айланиши мумкин бўлган қадамдан қайтариши керак”, деб таъкидлаган. Хусусан, Блинкен коинотдаги ҳар қандай ядровий портлаш нафақат Америка сунъий йўлдошларини, балки Хитой ва Ҳиндистон сунъий йўлдошларини ҳам йўқ қилишини эслатиб ўтган. “Қолаверса, бундай қуроллардан фойдаланиш глобал алоқа тизимларини ишдан чиқариши, бу эса фавқулодда хизматлардан тортиб мобил алоқанинг узилишигача олиб келиши мумкин”, дейди АҚШ расмийлари ва таҳлилчилар.
NYT’нинг маълумот беришича, Америка разведкаси янги қуроллар ишлаб чиқилиши ҳақида Россия Федерацияси томонидан 2022 йил бошида амалга оширилган бир нечта махфий сунъий йўлдош учирилишидан кейин хабар топган. Юқори мартабали разведка ходимларидан бирининг айтишича, глобал коммуникацияларга таҳдид туғилган тақдирда, Путин унинг рақибларидан ҳеч бири, шу жумладан Қўшма Штатлар Россия билан тўғридан-тўғри қаршиликка киришмаслигига ишончи комил. Шу сабабли Россия ўз космик ядровий қуролларни ишлаб чиқмоқда.
Шу билан бирга, Америка расмийлари Россия, космосга ҳаттоки бундай қуроллар жойлаштирилган тақдирда ҳам, улардан фойдаланиши даргумон, дея фикр билдирган. Бироқ улар бошқа давлатлар, масалан, КХДР Россиядан ўрнак олиши мумкинлигидан хавотирда.
Изоҳ (0)