Хитойлик тайконавтлар “Тянгун” миллий орбитал станцияси бортидан очиқ космосга бир неча соатлик муваффақиятли чиқишни амалга оширди. Бу ҳақда ХХР Бошқариладиган космик парвозлар дастури бошқармаси (CМСА) хабар берди.
Маълум қилинишича, тайконавтлар Чен Дун ва Чен Чжунжуй 22 май куни космик бўшлиқда жами саккиз соат бўлишган.
“Улар роботлаштирилган манипулятор ёрдамида метеоритлардан ҳимоя элементларини ўрнатдилар ва станциянинг ташқи ускуналари ҳолатини текширдилар. Экипажнинг учинчи аъзоси - Ван Сзе “Тянхе” асосий модули бортидан ҳамкасбларининг ишини қўллаб-қувватлаб турди”, дейилади хабарда.
Тайконавтлар станцияга 24 апрелда бошқариладиган “Шенчжоу-20” кемаси орқали етиб боришган. Уларнинг вазифаси октябргача давом этади, шундан сўнг уларни янги экипаж алмаштириши керак.
Та`кидланишича, “Шенчжоу-20” вазифаси “Тянгун” станциясига тўққизинчи экипаж экспедицияси бўлди.
Тахминан 400 км баландликдаги орбитада жойлашган Хитой космик станцияси учта тайконавтга мўлжалланган, бироқ экипажлар алмашинуви пайтида олти кишигача вақтинча қабул қилиши мумкин.
Станция “Тянхе” асосий модули ва унга икки томондан уланган иккита лаборатория модули – “Ментян” ва “Вентян”дан иборат бўлиб, улар вазнсизлик шароитида илмий тадқиқотлар ва тажрибалар ўтказиш учун фойдаланилади. У учта уланиш нуқтаси ва космосга чиқиш учун шлюз билан жиҳозланган.
Хитойнинг “Тянгун” орбитал лабораторияси Халқаро космик станциядан беш баравар кичик. Унинг ишлаш муддати камида 10 йилга мўлжалланган.
Изоҳ (0)