Калифорния аҳолисининг 44 фоизи штатнинг АҚШдан ажралишини истайди. Бу ҳақда Newsweek журнали Калифорния Мустақиллик институти (ICI) директори Коёт Маринга асосланиб маълум қилган.
ICI маълумотларига кўра, YouGov компанияси 11-23 июнь кунлари 500 нафар калифорниялик ўртасида 5,7 фоизлик хатолик чегараси билан сўровнома ўтказган.
“Сўралганларнинг деярли ярми — 44 фоизи Калифорниянинг АҚШдан тинч ва қонуний йўл билан ажралиш ниятини билдириш учун овоз беришга рози бўлган”, дейилади хабарда.
Институт вице-раиси Тимоти Воллмер “калифорнияликлар ўзини ўзи бошқаришга тайёр” эканлигини қўшимча қилган.
Таъкидланишича, АҚШдан ажралишни хоҳловчи калифорнияликлар сони бўйича аввалги рекорд натижа 2021 йилнинг июнь ойида қайд этилган бўлиб, ўшанда бу кўрсаткич 42 фоизни ташкил этган.
Бундан ташқари, YouGov сўрови натижалари шуни кўрсатдики, респондентларнинг 50 фоизи федерал ҳукуматга қараганда Калифорния ҳукуматига кўпроқ ишонч билдирмоқда. Сўралганларнинг 28 фоизи иккала ҳукуматга ҳам бир хил даражада ишонади. Шу билан бирга, ICI маълумотларига кўра, 2025 йилнинг январь ойида калифорнияликларнинг 47 фоизи иккала ҳукуматга бир хил даражада ишонган, фақат 34 фоизи штат ҳукуматига кўпроқ ишонч билдирган.
6 июнь куни Лос Анжелесда ноқонуний муҳожирларни оммавий ҳибсга олиш бошланди, 7 июнь куни кечқурунга келиб миграция қонунчилигини бузганликда айбланиб, камида 44 киши қамоққа олинди. Ҳуқуқни муҳофаза қилиш органларининг бу ҳаракатларига жавобан шаҳарда тартибсизликларга айланиб кетган намойишлар бошланди. АҚШ президенти Дональд Трамп Калифорния губернатори Гевин Ньюсомни четлаб ўтиб, тартибсизликларни бостириш учун Лос Анжелесга Миллий гвардия аскарларини юборишни буюрди. Шундан сўнг Ньюсом Трамп ва Пентагон раҳбари Пит Хегсетга қарши судга мурожаат қилди. Губернатор Миллий гвардия аскарларини Лос Анжелесга юбориш тўғрисидаги қарорни ғайриқонуний деб топишни сўради.
Изоҳ (0)