АҚШ НАТО иттифоқчиларига тахминан 10 миллиард долларлик қурол-яроғ сотишни режалаштирмоқда. Бу ҳақда манбаларга таяниб, Axios хабар берди.
Президент Дональд Трамп альянс бош котиби Марк Рютте билан учрашувда НАТО ҳамкорларига “энг замонавий қуролларни” юбориш ниятида эканини айтган. Улар бу қуролларни Украинага беришлари мумкин бўлади. НАТО давлатларига ракеталар, ҳаво ҳужумидан мудофаа тизимлари ва артиллерия ўқларини сотиш кўзда тутилган. Бундан ташқари, АҚШ Европага қисқа масофали ракеталар, гаубитсалар учун ўқлар ва ўрта масофали “ҳаво-ҳаво” тоифасидаги ракеталарни ҳам сотиши мумкин.
Трамп альянс бош котиби билан учрашувда Европага “миллиардлаб долларлик ҳарбий техника” етказиб берилишини тилга олган. Аммо деярли ҳеч қандай тафсилотларни келтирмаган. У АҚШ ҳамкор давлатларга 17 та Патриот зенит-ракета мажмуасини етказиб беришга тайёрланаётганини билдирган. Орйх лойиҳасининг ҳисоб-китобларига кўра, кенг кўламли уруш бошланганидан бери иттифоқчилар Киевга атиги еттита шундай мажмуа етказиб берган.
Патриот тизимларининг эҳтимолий етказиб берилиши ҳақида Трамп 14 июль куни журналистлар билан учрашувда ҳам гапирганди. Ўшанда Америка президенти Украина ҳаво ҳужумидан мудофаа тизимларига “жуда муҳтож” эканини айтган. Ушбу қарор уруш бошланганидан бери Украинага фақат мудофаа қуролларини етказиб беришни афзал билган Трамп сиёсатидаги сезиларли бурилиш сифатида баҳоланмоқда.
Изоҳ (0)