Украинани қуроллантириш мақсадида АҚШ Хитойдан қарз олишга мажбур бўлмоқда. Бу ҳақда америкалик сенатор Ренд Пол YouTube’даги Маrio Nawfal каналига берган суҳбатида маълум қилди.
“Украина можаросига янада чуқурроқ аралашиб қолиш хавфи мавжуд. Шу боис, бизда маблағ йўқлигини таъкидлашда давом этмоқдаман ва эътиборимизни ички муаммоларга қаратганимиз маъқулроқ бўларди Масаланинг ахлоқий жиҳати ҳақида исталганича гапириш мумкин, бироқ амалда вазият шундай. Украинани қуроллантириш учун биз Хитойдан қарз олишга мажбур бўлмоқдамиз”, деди сенатор.
Унинг айтишича, кўплаб америкалик сиёсатчилар масаланинг иқтисодий томонини эътибордан четда қолдириб, катта мақсадларга интилишга тайёр.
Полнинг таъкидлашича, АҚШда ҳарбий йўл тарафдорлари деб аталадиган “лочинлар” ҳарбий можарони янада кўпроқ молиялаштиришни хоҳлайди. “Сўллар” эса Киевга янада кўпроқ ёрдам маблағи ажратмоқчи эканлигини айтади.
Сенаторнинг фикрича, АҚШ ҳукумати Украина можаросига янада чуқурроқ аралашиб, ўзини қарзга ботириш ўрнига, эътиборни мамлакатнинг ички муаммоларига қаратгани маъқул.
АҚШ сенаторлари 13 июль куни президент Дональд Трампга Россияга қарши кескин санкциялар киритиш тўғрисида таклиф берди. Унда Москвага ёрдам берадиган давлатларга 500 фоизлик бож солиш назарда тутилмоқда.
Изоҳ (0)