Исроил кучлари қамалда қолган Ғазони бомбардимон қилишда давом этмоқда. 14 июль куни секторга қилинган ҳужумлар оқибатида 78 фаластинлик ҳалок бўлди. Бу ҳақда Al Jazeera хабар берди.
Wафа агентлигига кўра, Исроилнинг Рафаҳдаги ёрдам тарқатиш пунктига уюштирган ҳужуми оқибатида камида 5 киши ҳалок бўлган. Шу билан, Исроил ва АҚШ томонидан қўллаб-қувватланадиган Ғазо гуманитар жамғармаси ёрдам марказларида ҳалок бўлган фаластинликларнинг сони 838 нафарга етган.
Ғазо жанубидаги Хон Юнусда кўчманчилар лагерига берилган зарба оқибатида 9 киши ҳалок бўлиб, кўплаб одамлар яраланган. Бурейж қочқинлар лагери яқинидаги савдо марказига ҳужум уюштирилиши сабаб 4 нафар одам қурбон бўлган. Ғазо шаҳрида эса камида 24 нафар фаластинлик ўлдирилиб, яна ўнлаб кишилар жароҳатлангани маълум қилинган.
Исроил матбуоти Ғазо шаҳрида яҳудийларга пистирма уюштирилгани, танк ракета зарбасига учрагани, кейинроқ эса ўқотар қуроллар билан ўққа тутилгани ҳақида хабар берган. Кейинчалик Исроил ҳарбийлари ҳодиса оқибатида 3 нафар аскар ҳалок бўлганини тасдиқлаган. Al Jazeeraънинг хабар беришича, Исроил қўшинлари бунга жавобан Туффа ва Шужаеа маҳаллалари яқинида турар жой биноларини яксон қилиб, оммавий ҳаво ҳужумлари уюштирган.
Изоҳ (0)