Америка Қўшма Штатларининг собиқ президенти Барак Обама демократларни “ўз-ўзини таҳлил қилишни” тўхтатиб, Дональд Трамп бошқаруви шароитида қатъиятли ва аниқ ҳаракатлар кўрсатишга чақирди.
“Нолишни ва ҳимоясиз ҳолатда қолиб кетишни бас қилинг. Демократлар бирлашиб, қатъиятли бўлишлари лозим”, деди у.
Унинг фикрича, ҳозир лоқайдлик вақти эмас.
“Агар ҳафсалангиз пир бўлган ва ҳеч нарса қилмаётган бўлсангиз ўзингизни демократман деб айтманг. Айнан ҳозир ҳаракат қилиш пайти, айниқса сўз эркинлигини ҳимоя қилишда”, деди Барак Обама.
Обама партиядошларини Нью-Жерси ва Виржиния штатларидаги губернаторлик сайловларига эътибор қаратишга ундаган ва уларни партия мавқейини тиклаш учун “бошланғич нуқта” деб атаган.
Собиқ президент партия ичидаги келишмовчиликларни танқид қилиб, қуруқ сўзлардан амалий ечимларга ўтишга чақирди.
“Ишчиларни қанчалик яхши кўришингиз аҳамиятсиз, агар улар уй-жой сотиб ололмаса, чунки штатингиз қонунлари қурилишни имконсиз қилади ва ҳудудий режалаштириш кўп қаватли уйлар қурилишини тақиқлайди”, деди у партиядошларининг зиддиятларини очиқ-ойдин кўрсатиб.
Обама Трампнинг ҳокимиятга қайтиши фонида сўзлаган нутқида Республикачилар партиясида “тўхтатувчи кучлар” йўқлигини таъкидлаган, иттифоқчилар билан тариф урушларини танқид қилган ва америкаликлар ҳуқуқларига таҳдид солаётган автократик тенденциялардан огоҳлантирган. Шунингдек, у ҳуқуқшунослик фирмалари ва университетлар каби муассасаларни ҳукумат босимига қарши туришга чақирган.
“Фарзандларимиз ва набираларимиз учун ўз қадриятларимиз ва мамлакат келажагини ҳимоя қилишда жасорат кўрсатишимиз шарт”, дейди Обама.
Ўтган ойда Барак Обама АҚШ кўпроқ автократик бошқарувга “хавфли даражада яқинлашиб қолганидан” огоҳлантириб, америкаликларни сўз эркинлиги учун “фақат осон ва урфга кирган пайтдагина эмас” курашишга ундаган.
“Ҳозир ҳар биримиз синовдан ўтишимиз керак бўлган вазият юзага келмоқда - шунда биз нимага чин дилдан ишонишимизни аниқлаб олишимиз лозим бўлади”, дея қўшимча қилган АҚШ собиқ президенти.
Бундан аввал АҚШ президенти Дональд Трамп ўзининг Truth Social ижтимоий тармоғида Оқ уйнинг собиқ раҳбари Барак Обамани Эрон ядро дастурини ривожлантиришда айбловчи мем жойлаштирди.
Изоҳ (0)