Украина президенти Владимир Зеленский бош вазир Денис Шмигалга мамлакат Мудофаа вазирлигини бошқаришни таклиф қилди. Бу ҳақда у 14 июль, душанба куни кечқурун ўзининг Telegram каналида маълум қилган.
“Денис Шмигалнинг улкан тажрибаси, албатта, Украина мудофаа вазири лавозимида фойдали бўлади. Чунки ҳозир айнан шу соҳада мамлакатнинг энг катта ресурслари, энг кўп вазифалар ва жуда катта масъулият жамланган”, деди Зеленский ҳукуматдаги режалаштирилаётган ўзгаришларга изоҳ берар экан.
У, шунингдек, Олий Рада Украина ҳукуматининг янги таркибини қўллаб-қувватлашига умид билдирди ҳамда кабинет тез орада Киев ҳамкорлари билан тузилган барча келишувларнинг “аудити”ни ўтказиши, қайсилари ишлаётгани, қайсилари қайта кўриб чиқилиши ёки фаоллаштирилиши кераклигини аниқлаши лозимлигини қўшимча қилди.
Ҳозирда Украина Мудофаа вазирлигини Рустем Умеров бошқаради. 10 июль куни Владимир Зеленский матбуот анжуманида Умеров мамлакатнинг АҚШдаги элчиси этиб тайинланиши мумкинлигини айтган эди.
Украина бош вазири ким бўлади?
Зеленский, шунингдек, бош вазирнинг биринчи ўринбосари ва мамлакат иқтисодиёт вазири Юлия Свириденкога Украина бош вазири лавозимини таклиф қилганини маълум қилди.
“Юлия Свириденкога Украина ҳукуматини бошқаришни ва унинг ишини сезиларли даражада янгилашни таклиф қилдим. Янги ҳукумат дастури тез орада тақдим этилишини кутяпман”, деб ёзди Зеленский. У бу қадамни “Украинада ижро ҳокимияти тизимини янгилаш” сари ташланган муҳим қадам деб атади.
Маълумотларга кўра, айнан Свириденко АҚШ билан ресурслар бўйича келишув юзасидан музокараларни олиб борган ва уни 2025 йил апрелида Украина номидан имзолаган.
“Украинская правда” нашрининг манбаларига кўра, эски ҳукуматни истеъфога чиқариш 16 июлга режалаштирилган. Бир кун ўтиб Олий Рада янги Вазирлар Маҳкамасини тасдиқлаши керак бўлади.
Изоҳ (0)