АҚШ президенти Дональд Трампнинг Украина бўйича махсус вакили Кейт Келлог 14 июль куни расмий ташриф билан Киевга келди. Бу ҳақда Deutsche Welle хабар берди.
Украина президенти девони раҳбари Андрей Ермак АҚШ вакилининг ташрифига муносабат билдириб, муҳокамалар марказидан мудофаа, хавфсизликни мустаҳкамлаш, қурол-яроғ, санкциялар ва бошқа муҳим мавзулар ўрин олишини таъкидлади.
“Мудофаа, хавфсизликни мустаҳкамлаш, қурол-яроғ, санкциялар, халқни ҳимоя қилиш, Украина ва АҚШ ўртасидаги ҳамкорликни мустаҳкамлаш... Муҳокама қилинадиган масалалар кўп. Руссия ўт очишни тўхтатмоқчи эмас. Биз АҚШ президенти Дональд Трампнинг ‘куч орқали тинчлик’ принципини қўллаб-қувватлаймиз”.
Келлог Украина пойтахтида қанча бўлиши номаълум. Аввалроқ у Киевга бир ҳафталик ташриф режалаштирганини айтган эди.
Махсус вакил бу ҳақда илк бор Украинани тиклаш бўйича Римда бўлиб ўтган конференцияда маълум қилган, кейинроқ Украина ташқи ишлар вазирлиги ҳам кутилаётган ташриф ҳақидаги хабарларни тасдиқлаган эди. Келлогнинг ташрифи Дональд Трамп россиялик ҳамкасбидан “ҳафсаласи пир бўлганини” айтган воқеалар фонида юз бермоқда. Шу боис махсус вакилдан жиддий баёнотлар кутиляпти.
Изоҳ (0)