Россия президенти Владимир Путин АҚШ президенти Дональд Трампга Москва Украинадаги урушнинг “туб сабабларини” бартараф этишдан воз кечмаслигини айтди. Бу ҳақда Al Jazeera хабар берди.
Президентлар 3 июль куни 1 соат давомида телефон орқали суҳбатлашган. Кремль ёрдамчиси Юрий Ушаков “Россия ортга чекинмаслигини” маълум қилган. Бироқ у Путин “можарога сиёсий ва музокаралар йўли билан ечим излашга тайёрлигини” билдирган.
Трамп суҳбатдан сўнг Путин билан ўт очишни тўхтатиш бўйича “ҳеч қандай олдинга силжиш бўлмаганини” ва Украинадаги урушдан “хурсанд эмаслигини” қўшимча қилган. Бу телефон суҳбати Трамп иккинчи президентлик муддатини бошлаганидан бери олтинчиси бўлди. Бундан олдинроқ Пентагон Киевга баъзи қурол-яроғлар, жумладан, ҳаво ҳужумидан мудофаа ракеталари ва аниқ бошқариладиган артиллерия етказиб беришни тўхтатаётганини тасдиқлаганди. Бу қарорга собиқ президент Жо Байден маъмурияти даврида ваъда берилганди.
Таъкидланишича, суҳбат давомида тўхтатилган қурол-яроғ етказиб бериш мавзуси очилмаган. АҚШ президенти урушни тезроқ тугатиш масаласига урғу берган. Юзма-юз учрашув истиқболи муҳокама қилинмаган бўлса-да, икки етакчи суҳбатни давом эттиришга келишиб олган.
Гарчи Трамп Украина урушида воситачилик қилишга уринган бўлса-да, у бу борада оз ютуққа эришган. Путин ҳозирча Вашингтоннинг шартсиз ўт очишни тўхтатиш таклифини рад этмоқда. Украина бу таклифни қўллаб-қувватлаган.
Москва ҳар қандай тинчлик музокараларида уч томонлама форматдан қочишга ҳаракат қилмоқда. Украина расмийларининг айтишича, россиялик расмийлар июнь ойи бошида Истанбулда бўлиб ўтган учрашувда америкалик дипломатлардан “хонани тарк этишни” сўраган.
Путин ва Трамп охирги марта июнь ойи ўрталарида суҳбатлашган эди. Ўшанда Путин 12 кунлик Эрон-Исроил урушида воситачилик қилишни таклиф қилганди. Трамп Путиннинг таклифига жавобан эътиборни яна Украинага қаратиб, шундай деган: “Йўқ, Эрон масаласида менга ёрдам керак эмас. Сен билан муносабатимизда ёрдам керак”.
Ушаковнинг айтишича, пайшанба кунги суҳбат чоғида Путин Эрон билан боғлиқ барча “низолар, келишмовчиликлар ва можароли вазиятларни” дипломатик йўл билан ҳал қилиш зарурлигини таъкидлаган.
Изоҳ (0)