Ўзбекистоннинг олтин-валюта захиралари миқдори 2025 йил июль ойи якунига кўра 48,74 млрд долларни ташкил этди. Бу ҳақда Марказий банк маълумотларида келтирилган.
Бу кўрсаткич ўтган ойга нисбатан 193,7 миллион долларга (0,4 фоизга) кўпдир. Йил бошидан буён мамлакатнинг олтин-валюта захиралари 7,56 миллиард долларга (18,4 фоизга) ўсди.
Захиралардаги олтиннинг физик ҳажми 20 минг трой унсияга (0,6 тонна) камайиб, 11,7 миллион троя унсиясини (363,9 тонна) ташкил этди. Шунга қарамай, олтин заҳираларининг қиймати нарх ўсиши ҳисобига 38,68 миллиард долларга етди. Бу янги рекорд кўрсаткич. Июнь ойидаги кўрсаткичдан 265 миллион долларга кўпдир.
Валюта захиралари эса 63,3 миллион долларга қисқариб, 9,5 миллиард долларни ташкил этди. Бу февраль ойидан бери қайд этилган энг паст кўрсаткичдир.
Жаҳон олтин кенгаши маълумотларига кўра, июнда Ўзбекистон дунё бўйича энг кўп олтин харид қилди. 2025 йил июнь ойида дунё марказий банклари жами 22 тонна олтин сотиб олган. Бу кетма-кет учинчи ойда ойлик асосда талабнинг бир оз ортганини англатади. Июнда Ўзбекистон 9 тонна олтин сориб олди. Мамлакат тўрт ой давом этган “сотув режимидан” чиқиб, яна олтин жамғаришни бошлаган.
Изоҳ (0)