Бухоро вилоятида ижтимоий тармоқ орқали бегона қизга шилқимлик қилган йигит 5 суткага маъмурий қамоққа олинди.
Маълум қилинишича, вилоятнинг Шофиркон туманида 1998 йилда туғилган йигит ўзига таниш бўлган Жондор туманида яшовчи, 1987 йилда туғилган аёлга Telegram орқали хабарлар юбориб, унинг тинчини бузган.
Жабрланувчи аёл эса унинг устидан судга мурожаат қилган. Ҳолат юзасидан ҳуқуқбузарга нисбатан 5 сутка маъмурий қамоқ жазоси тайинланди.
Куни кеча Наманганда йўловчига шилқимлик қилган Damas ҳайдовчиси 3 суткага қамалган эди.
Тошкент вилояти Нурафшон шаҳрида 60 ёшли эркак 6 ёшли қўшнисига тегажоғлик қилганликда айбланаётгани ҳақида хабар берилганди. Шунингдек, Андижонда мактаб директори ўринбосари ўқувчи қизларга тегажоғлик қилаётгани айтилган, Тошкентда метро вагонида нотаниш қизга шилқимлик қилган эркак беш суткага қамалган эди.
Тошкент шаҳар Юнусобод туманида ўқитувчи эркак собиқ ўқувчисини дўстининг олдида ҳақоратлаб, тегажоғлик қилган эди.
Шунингдек, Тошкент шаҳрининг Яккасарой туманидаги рассомчилик мактаби ўқитувчиси дарс пайтида ўқувчи қизга шилқимлик қилгани учун 5 суткага қамалганди.
Изоҳ (0)