Toshkent shahrining Yakkasaroy tumanidagi rassomchilik maktabi o‘qituvchisi dars paytida o‘quvchi qizga shilqimlik qilgani uchun 5 sutkaga qamaldi. Bu haqda “Daryo”ga Toshkent shahar sudlari axborot xizmati maʼluma qildi.
2025-yil 3-mart kuni Toshkent shahar jinoyat ishlari bo‘yicha Yakkasaroy tuman sudida o‘qituvchining qilmishi ko‘rib chiqilgan.
Maʼlum bo‘lishicha, 25 yoshli o‘qituvchi M.D. 2025-yil 16-fevral kuni soat 13:30 da rassomchilik to‘garagi maktabida tahsil oluvchi B.A.ning qaddi-qomatini tavsiflab, uning yelkalarini ushlagan va uqalagan. Shuningdek, qo‘llarini silab, quchoqlab, o‘quvchi qizga shahvoniy shilqimlik qilgan.
Sud majlisida huquqbuzar M.D. aybiga to‘liq iqrorlik bildirib, rassomchilik to‘garagi maktabida o‘qituvchi ekanligini, B.A. o‘quvichisi bo‘lishini, 16-fevral kuni dars davomida o‘quvchilarga berilgan topshiriqni o‘quvchi qiz yaxshi bajargani uchun uni quchoqlaganini gapirib bergan. Shuningdek, bu qilmishidan afsusdaligini, holat takrorlanmasligini aytib, yengillik so‘ragan.
Sudda so‘z olgan jabrlanuvchi, o‘quvchi qizning onasi esa qizi o‘qituvchisi dars vaqtida unga shilqimlik qilganini aytgani uchun 102 ga qo‘ng‘iroq qilib, o‘qituvchiga chora ko‘rishlarini so‘raganini aytdi. U suddan ham o‘qituvchiga qonuniy chora ko‘rishni so‘radi.
Sudya Jasur Hojimurodov ishni ko‘rib chiqib, dalillar bilan tanishib, o‘qituvchini Maʼmuriy javobgarlik to‘g‘risidagi kodeksning 41-1-moddasi 1-qismi bilan (shahvoniy shilqimlik qilish) aybdor deb topib, unga nisbatan 5 sutka maʼmuriy qamoq jazosini tayinladi. Jazoni o‘tash muddati 2025-yilning 3-mart kunidan boshlab hisoblanishi belgilandi.
Izoh (0)