Эрон 16 июль куни Уммон кўрфазида 2 миллион литр ёнилғини контрабанда қилаётган хорижий танкерни қўлга олди. Бу ҳақда Al Arabiya хабар берди.
Адлия бошқармасининг хабар қилишича, кема юклари билан боғлиқ ҳуқуқий ҳужжатлар тўлиқ эмаслиги аниқлангани сабаб тўхтатиб қолинган.
“17 нафар гумонланувчи, жумладан, хорижий танкер капитани ва экипаж аъзолари ҳибсга олинди”, дейилади хабарда.
Ҳибсга олинганларнинг шахси ва миллатига аниқлик киритилмаган. Таъкидланишича, юкнинг таркиби ва қонунийлигини текшириш учун лаборатория синовлари ўтказилиб, ҳужжатлар қайта кўриб чиқилмоқда.
Бир неча ой олдин Эрон инқилобий гвардияси Форс кўрфазида 1,5 миллион литр дизель ёнилғисини олиб кетаётган Танзания байроғи остидаги 2 та танкерни қўлга туширганди. Кейинчалик ушбу кемалар суд жараёни учун Бушер портига ўтказилган. “Денгиз рейнжери” ва “Салама” кемалари бортида 25 нафар хорижлик экипаж аъзоси бўлган.
Ёнилғи контрабандаси Эрон нефтига қўйилган халқаро санкциялар ва қўшни давлатлар билан нархдаги кескин фарқ каби омиллар билан боғлиқ. Бу шароитлар нефть хом ашёси ва қайта ишланган ёнилғининг ноқонуний савдоси кенг тарқалишига олиб келган.
Изоҳ (0)