Тошкент шаҳар Юнусобод туманида ўқитувчи эркак собиқ ўқувчисини дўстининг олдида ҳақоратлаб, тегажоғлик қилди. Бу ҳақда шаҳар судлари “Дарё”га хабар берди.
Маълум қилинишича, 23-январь куни эрталаб С.И. ўзининг собиқ ўқувчисини кўчада дўсти билан бирга кетаётганини кўриб қолган. У бундан ғазабланиб, вояга етмаган қизнинг йўлини тўсиб, уни ҳақоратлай бошлаган, телефонини олиб қўйиб, мажбуран машинасига ўтқазган.
Эркак ўз қилмишини собиқ ўқувчисига нисбатан туйғулари борлиги, унга уйланмоқчилиги, ҳатто уйига совчилар жўнатгани (иш кўрилган вақтда қиз вояга етмаган бўлган, унинг манфаатларини судда онаси ҳимоя қилган) билан изоҳлаган.
Суд мажлисида жабрланувчининг онаси эркакнинг бундай ҳаракатлари биринчи марта содир бўлмаганини айтди. У илгари ҳам кўп марта қизига шунга ўхшаш ҳаракатларни содир қилгани ва қизини тинч қўймаганини билдирган. Шу сабабли унга қилмиши учун қонуний жазо кўрилишини сўради.
Жиноят ишлари бўйича Юнусобод туман суди 2025 йил 5-март куни 1994 йил 30-августда туғилган С.И. Маъмурий жавобгарлик тўғрисидаги кодекснинг 61-2-моддаси 1-қисми (мулкни қасддан нобуд қилиш ёки унга зарар етказиш) ҳамда 183-моддаси (майда безорилик) билан айбдор деб топди ва унга 5 сутка маъмурий қамоқ жазоси тайинланди.
Бундан аввал Тошкент шаҳрининг Яккасарой туманидаги рассомчилик мактаби ўқитувчиси дарс пайтида ўқувчи қизга шилқимлик қилгани учун 5 суткага қамалганди. Шундан сўнг Болалар омбудсмани суд қарорига протест киритди.
Изоҳ (0)