Тошкентда бегона аёлнинг танасидан ушлаб, шилқимлик қилган тарвуз сотувчиси 5 суткага қамалди

Тошкентда харидор аёлнинг танасидан ушлаб, унга тегажоғлик қилган маст эркакка жазо тайинланди. 

Суд ҳужжатларига кўра, 25 июнь куни Тошкент шаҳар Чилонзор тумани Алгоритм мавзеси Заргарлик кўчасида тарвуз сотувчиси 33 ёшли У.I. маст ҳолатда ўзига нотаниш бўлган харидор аёлнинг белидан паст қисми ва думба қисмларини қўли билан ушлаб, шаҳвоний шилқимлик қилгани аниқланган.

“УзНеwс”нинг Олий суд порталига таяниб ёзишича, суд мажлисида сўралган ҳуқуқбузар эркак ўзининг юқорида кўрсатиб ўтилган ҳолатдаги айбига иқрорлигини, ҳозирда қилмишидан пушаймонлигини, бундан кейин бу каби ҳаракатларни содир этмаслигини билдириб, суддан унга нисбатан енгиллик беришни сўраган.

Суд қарори билан У.I.га Маъмурий жавобгарлик тўғрисидаги кодекс 41-1-моддасининг 1-қисмига (шаҳвоний шилқимлик қилиш) асосан 5 сутка маъмурий қамоқ жазоси, 194-модда 1-қисмига (Ўзбекистон Республикаси Миллий гвардияси ҳарбий хизматчисининг (ходимининг) қонуний талабларини бажармаслик) асосан эса БҲМнинг 10 баравари миқдорида, яъни 3,4 миллион сўм жарима жазоси тайинланган.

Аввалроқ Тошкент вилояти Нурафшон шаҳрида 60 ёшли эркак 6 ёшли қўшнисига тегажоғлик қилганликда айбланаётгани ҳақида хабар берилганди. Шунингдек, Андижонда мактаб директори ўринбосари ўқувчи қизларга тегажоғлик қилаётгани айтилган, Тошкентда метро вагонида нотаниш қизга тегажоғлик қилган эркак беш суткага қамалган эди.