Namangan viloyatida yo‘lovchiga shilqimlik qilgan Damas haydovchisi 3 sutkaga qamaldi. Holat yuzasidan sud hujjati e’lon qilindi.
Sud hujjatiga ko‘ra, 8-iyul kuni soat 00:30 atrofida Damas haydovchisi yo‘lovchi sifatida ketayotgan N.B.ning son qismi va ko‘kragidan ushlab, shahvoniy shilqimlik qilgan.
Shu sababli Ma’muriy javobgarlik to‘g‘risidagi kodeksning 41-moddasi 1-qismi bilan 5 sutka ma’muriy qamoq jazosi tayinlangan.
Shundan so‘ng apellyatsiya shikoyatida, qilmishidan chin ko‘ngildan pushaymonligi, jabrlangan N.B.dan kechirim so‘ragani va jabrlanganning unga nisbatan da’vosi yo‘qligini inobatga olib, yengillik berishni so‘ragan.
Sud qaroriga ko‘ra, qaror o‘zgartirildi, 3 sutka ma’muriy qamoq jazosi tayinlandi. Apellyatsiya shikoyati qisman qanoatlantirildi.
O‘zbekistonda 4 oyda zo‘ravonlikka uchragan 2 317 nafar xotin-qizga yordam ko‘rsatildi.
Toshkent viloyati Nurafshon shahrida 60 yoshli erkak 6 yoshli qo‘shnisiga tegajog‘lik qilganlikda ayblanayotgani haqida xabar berilgandi. Shuningdek, Andijonda maktab direktori o‘rinbosari o‘quvchi qizlarga tegajog‘lik qilayotgani aytilgan, Toshkentda metro vagonida notanish qizga shilqimlik qilgan erkak besh sutkaga qamalgan edi.
Toshkent shahar Yunusobod tumanida o‘qituvchi erkak sobiq o‘quvchisini do‘stining oldida haqoratlab, tegajog‘lik qilgan edi.
Shuningdek, Toshkent shahrining Yakkasaroy tumanidagi rassomchilik maktabi o‘qituvchisi dars paytida o‘quvchi qizga shilqimlik qilgani uchun 5 sutkaga qamalgandi.
Izoh (0)