Тошкент шаҳар Чилонзор туманида хитойлик аёлга тегажоғлик қилган сантехникка суд ҳукми ўқилди. Бу ҳақда шаҳар суди ахборот хизмати “Дарё”га хабар берди.
Айтилишича, 2023 йил 1 ноябрь куни чет эл фуқароси, хитойлик аёл Чилонзор тумани ИИО ФМБга ариза билан мурожаат қилиб, унда яшаш уйига сантехник ишларини бажариш учун келган фуқаро У.С. шилқимлик қилиб, қўлидан ушлаб, қучоқлаб олганини маълум қилган. Унга нисбатан қонуний чора кўришни сўраган.
Суд мажлисида сўралган фуқаро юқорида кўрсатиб ўтилган ҳолатдаги айбига иқрорлигини, бундай ҳолат бошқа такрорланмаслигини, енгиллик беришни сўради. Унинг мазкур ҳуқуқбузарликни содир қилгани, унинг ўз айбига иқрорлик билдириб берган кўрсатуви, ИИО ходимининг билдиргиси, маъмурий ҳуқуқбузарлик тўғрисидаги баённома, тушунтириш хатлари, суд мажлиси жараёнида аниқланган ҳолатлар ва иш материалларида мавжуд бўлган далиллар билан тўлиқ тасдиғини топди.
Эркак Маъмурий жавобгарлик тўғрисидаги кодекснинг 411-моддасининг 1-қисмида кўрсатилган ҳуқуқбузарликни содир этганликда айбдор деб топилди ва унга нисбатан 5 сутка маъмурий қамоқ жазоси тайинланди.
Изоҳ (0)