Дунё ва ўзбек спортига оид 16 июнь кунининг муҳим хабарлари дайжести билан танишинг.
Ўзбекистон
ЖЧ—2022 дан қуруқ қолган Ўзбекистон миллий терма жамоаси Тошкентга қайтиб келди
16 июнь куни Ўзбекистон делегацияси Тошкентга етиб келди. Бироқ терма жамоа вакиллари орасида бош мураббий Вадим Абрамов кўриниш бермаган. «Championat.asia» ходимлари Ўзбекистон терма жамоаси аъзоларидан кичик интервью беришни сўраган, бироқ кўпчилик бу таклифларни рад этган. Терма жамоа ёрдамчи мураббийи Анвар Ғофуров журналистларга ҳозир интервьюнинг мавриди эмаслигини айтаётган вақтда аэропорт атрофига йиғилган мухлислар мутахассисдан изоҳ талаб қила бошлади. Хусусан, улар нима сабабдан Саудия Арабистонига қарши ўйинда тактика ўзгаргани, айрим футболчилар захирада қолиб кетгани ва шу каби саволларга жавоб талаб қилган. Мутахассис уларнинг айримлари жавоб қайтарган ва мураббийлар штабининг мақсади ҳам ғалаба қозониш эканини алоҳида таъкидлаган.
Шунингдек, терма жамоалар бўлими раҳбари Азиз Ҳайдаров ҳам ўз фикрларини билдириб ўтди. Мутасадди Абрамов ўйинга икки кун қолганда ўйин услубини ўзгартиргани ҳақида гапирди ва ўзига қолса аллақачон Абрамовни ишдан олиб ташлаган бўлишини айтди. Батафсил бу ерда ўқинг.
Шоҳжаҳон Эргашев уйланди
15 июнь куни ўзбекистонлик боксчи Шоҳжаҳон Эргашев уйланди. 12 июнь куни боксчи Тошкентда профессионал фаолиятидаги 20-жангини ўтказган ва унда танзаниялик рақибини муддатидан аввал мағлуб этганди.
Жаҳон
Евро—2020 да 2-тур бошланди. 16 июнь куни А ва B гуруҳидаги ўйинлар бўлиб ўтди. Италия терма жамоаси Швейцариянинг йирик ҳисобда таслим этиб, мусобақа йўлланмасини муддатидан аввал ҳал қилди. Шу тариқа Италия кетма-кет 29-ўйинда мағлубиятга учрамади. Жамоа рекордининг такрорланишига яна битта ўйин қолди. Италия кетма-кет тўртинчи Еврода плей-офф босқичига йўл олди. Сўнгги бор 2004 йилги мусобақада Швеция ва Дания уни гуруҳда қолдириб кетганди.
Рамос «Реал»ни тарк этади
«Реал» ҳимоячиси Серхио Рамос 16 йиллик фаолиятидан кейин мадридликлар сафини тарк этмоқда. Бу ҳақда клуб расман маълум қилди. Ҳозирча футболчи қайси клубга ўтиши маълум эмас.
Роналду бошлаб берган «челленж» давом этади
Франция терма жамоаси ярим ҳимоячиси Пол Погба Евро—2020 1-тури доирасида Германияга қарши кечган ўйиндан (1:0) кейинги матбуот анжуманида қатнашди. Футболчи анжуман вақтида ёнида турган пиво идишини нарироққа суриб қўйди. Аввалроқ Роналду матбуот анжумани вақтида Coca-Cola солинган идишларни нарига суриб қўйганди.
Эслатиб ўтамиз, Погба мусулмон динига эътиқод қилади.
[twitter count="1404936807960039426" user="laoctavasports"]
Миллатчиликда айбланган Арнаутович дисквалификация қилинди
Австрия терма жамоаси ҳужумчиси Марко Арнаутович Шимолий Македонияга қарши ўйинда рақиб футболчиларининг келиб чиқишини ҳақорат қилгани учун УЕФА томонидан Евронинг битта ўйинига дисквалификация қилинди. Шу тариқа футболчи Нидерландияга қарши ўйинни ўтказиб юборади.
АПЛ 2021/22 йилги мавсум тақвими эълон қилинди
Англия Премьер Лигасининг 2021/22 йилги мавсуми тақвими эълон қилинди. Унга кўра янги мавсум 14 август куни старт олади ва 22 майга қадар давом этади.
1-тур рўйхати билан танишинг (тўлиқ тақвим)
- «Брентфорд» — «Арсенал»
- «Бёрнли» — «Брайтон»
- «Челси» — «Кристал Пэлас»
- «Эвертон» — «Саутҳэмптон»
- «Лестер» — «Вулверҳэмптон»
- «Манчестер Юнайтед» — «Лидс»
- «Ньюкасл» — «Вест Ҳэм»
- «Норвич» — «Ливерпуль»
- «Тоттенҳэм» — «Манчестер Сити»
- «Уотфорд» — «Астон Вилла»
«Манчестер Сити» ёзги трансфер ойнасида ҳужум чизиғини кучайтирмоқчи. «Шаҳарликлар»нинг асосий мақсади «Тоттенҳэм» форварди Ҳарри Кейн бўлиб турибди. Шунингдек, «Сити» шорт-листида Жоау Феликс («Атлетико») ва Микель Ойарсабаль («Реал Сосьедад») каби футболчилар бор, дея хабар қилмоқда Эуроспорт.
«Челси» «Боруссия Д»дан Эрлинг Ҳоландни сотиб олмоқчи. Лондонликлар норвегиялик футболчи учун ўз ҳужумчиси Тэмми Абраҳам ва қўшимча 70 миллион евро таклиф қилган. Бирор футболчи қўшилмаган тақдирда трансфер «кўклар»га 200 миллион еврога тушиши мумкин.
Копа Америкада коронавирус билан боғлиқ вазият жиддийлашмоқда
Бразилияда ўтаётган Америка Кубоги—2021 да мусобақа иштирокчиларида яна 11 та коронавирусга чалиниш ҳолати қайд этилди. Умумий ҳисобда 53 киши вирус юқтириб олган. Қайд этилишича, уларнинг камида 20 нафари футболчилар.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)