Муҳаммад алайҳиссалом дунё ҳукмдорларига йўллаган мактублар нусхаси Тошкентдаги экспозициядан жой олади

Пайғамбар Муҳаммад алайҳиссалом дунё ҳукмдорларига ёзган мактубларининг папирусга кўчирилган нусхаси Тошкент шаҳридаги Ислом цивилизацияси маркази экспозициясидан ўрин олиши режалаштирилмоқда. Бу ҳақда жорий йил 7 август куни марказ ахборот хизмати хабар берди.

Маълум қилинишича, экспозициядан энг муҳим тарихий хатлардан бири — Рим императори Ҳирақлюсга (Гераклиюс) юборилган мактубнинг илмий асосланган реконструкцияси жой олади. Шу билан бирга, Эфиопия, Миср, Баҳрайн, Омон ҳукмдорлари, Форс шоҳига юборилган мактублардан нусхалар ўрин олиши кутилмоқда.

“Ушбу хатлар нафақат Исломнинг тинчликпарвар ва дипломатик руҳини, балки Расулуллоҳ (с.а.в)нинг сиёсий заковати ва инсонпарварлигини ҳам ёрқин намоён этувчи тарихий далиллардир”, дейилади хабарда.

Мусулмонлар идораси берган маълумотларга кўра, Пайғамбар алайҳиссалом Византия, яъни Шарқий Рим императори Ҳирақлюсни Ислом динига даъват этиб ёзган мактуб Иорданиядаги “Қирол Ҳусайн” масжиди музейида сақланади.

Ҳирақлюсга мактуб ҳижрий 7 йилнинг муҳаррам ойида, милодий 628 йилда ёзилган. Расулуллоҳ (с.а.в)нинг Византия раҳбари Ҳирақлюсга йўллаган даъват мактубининг ўзбек тилидаги мазмуни қуйидагича:

“Бисмиллаҳир Роҳманир Роҳийм. Аллоҳнинг Расули Муҳаммаддан Румнинг каттаси Ҳирақлюсга:

“Тўғри йўлга эргашганларга саломлар бўлсин. Аммо баъд, мен сени Ислом динига даъват этаман. Исломга кирсанг, жонинг омонда бўлади. Мусулмон бўл, Аллоҳ сенга икки ҳисса ажр беради. Ва агар Ислом динини қабул қилишдан бош тортсанг, арийсийлар, яъни халқингнинг гуноҳи сенинг гарданингга тушади”.

“Эй аҳли китоблар! Бизга ҳам, сизга ҳам баробар сўзга келинг: Аллоҳдан ўзгага ибодат қилмайлик, Унга ҳеч нарсани шерик қилмайлик ва Аллоҳни қўйиб, баъзимиз баъзимизни Роб қилиб олмайлик, дегин. Бас, агар юз ўгирсалар: ‘Гувоҳ бўлинглар, биз, албатта, мусулмонлармиз’, деб айтинглар” (Оли Имрон, 64).

Пайғамбар алайҳиссалом томонидан худди шундай даъват мактублари Рум қайсари билан бир вақтда Эрон кисросига, Ҳабашистон Нажошийсига, Миср азизига, Ғассон амирига ва Ямома маликига ҳам саҳоба элчилар орқали юборилган.