Қишки трансфер ойнасида Франциянинг “Ланс” клубидан 33 миллион фунт эвазига “Манчестер Сити”га кўчиб ўтган Ўзбекистон терма жамоаси ҳимоячиси Абдуқодир Ҳусанов учун Англиядаги ишлари яхши кетмаяпти. Аммо шундай бўлса-да, бир қанча таниқли нашрлар футболчига нисбатан катта ишонч билдирмоқда. Хусусан, Manchestercity.news сайти ўзбекистонлик ҳимоячининг Англиядаги қийинчиликлари ва ундаги муаммолар ҳақида тўхталди.
Янги жамоасида ҳозиргача 9 та ўйинда майдонга тушган 21 ёшли марказий ҳимоячи сўнгги саккизта учрашувда асосий таркибдан жой олмади. Бу эса мухлислар орасида турли саволлар туғилишига сабаб бўлди.
Кин: “Бу оддий мослашув босқичи”
Англия футболининг афсоналаридан бири Рой Кин ёш футболчининг бу ҳолатидан хавотир олмади. ITV телеканалига берган интервьюсида у шундай деди:
Ҳусановнинг омадсиз дебютидан кейин аста-секин ўз ўйинини топаётгани кўриниб турибди. Янги мамлакат, янги тил, янги футболчилар — буларнинг барчасига кўникиш вақт талаб қилади. Менимча, Ҳусанов бу босқични енгиб ўтади. Бу — ҳар бир футболчи дуч келадиган синов.
“Борнмут”га қарши ўйин: чарчоқ аломатлари
Ҳусанов февраль ойида “Манчестер Сити”да ойнинг энг яхши футболчиси деб топилди. Бу раҳбарият ва мухлисларнинг унга бўлган ишончидан дарак беради. Аммо март ойидаги Жаҳон чемпионати саралаши доирасидаги баҳслардаги чарчоқ аломатлари у учун қимматга тушди.
Миллий жамоа йиғинидан қайтган Ҳусанов “Борнмут”га қарши ўйинида ўнг марказий ҳимоячи сифатида ҳаракат қилди. Аммо у мазкур баҳсда ўзини кўрсата олмади: чарчоқ аломатлари, сариқ карточка сабаб Абдуқодир танаффусдан кейин алмаштирилди. Айтиш керакки, айнан Ҳусанов ўрнига майдонга тушган Нико O’Райлининг порлаши “Сити” учун ютуқ бўлса, ўзбекистонлик ҳимоячи учун ёмон сигнал эди.
Ёмон старт сабаблари нимада?
Daily Mail нашрининг хабарига кўра, Ҳусанов Англияга йўл олган вақт оралиғида бир ой давомида машғулот ўтказмаган. Бу Франциядаги қишки танаффус ва трансфер жараёнида “Ланс” сафидан кетгани билан боғлиқ.
У “Сити” билан бор-йўғи битта машғулот ўтказиб, дарров “Челси”га қарши дебют қилган эди. Ўша баҳсда хатога йўл қўйган Ҳусанов 54-дақиқада захирага олинди.
Шунингдек, ундаги тил билан боғлиқ муаммолар, мураббийнинг кўрсатмаларини тўлиқ англамаслик кўп нарсани ҳал қилди. Шу каби деталлар сабаб Абдуқодирнинг дебюти яхши чиқмади. Лекин кейинги баҳсларда, аниқроғи ЕЧЛ доирасидаги “Реал” билан учрашув ёки АПЛдаги “Ливерпуль”га қарши ўйинларда ўзбекистонлик ҳимоячи яхши даражасини кўрсата олди.
Абдуқодир Ҳусанов — “Сити”нинг келажак учун қурган пойдевори
Манбаларга кўра, ўзбекистонлик ҳимоячи жамоанинг кийиниш хонасида ижобий таассурот қолдирган. У айниқса Витор Рейс билан яқин дўстга айланган ва бу жуфтлик келгусида асосий ҳимоя тандеми бўлиши мумкин.
Аммо, чап қанот ҳимоясида O’Райлининг ёрқин ўйини ва Рубен Диаш — Йошко Гвардиол жуфтлиги ўтказаётган ажойиб учрашувлар эвазига ҳозирда Пеп Гвардиола ҳимоя чизиғини ўзгартиришни истамаяпти. Бу эса Ҳусановнинг ўйин амалиётига таъсир қилмоқда.
Лекин клуб ичида унга бўлган ишонч юқори. Айни дамда энг муҳим нарса — Ҳусановнинг инглиз тилини ўрганиши, жамоанинг ўйин фалсафасини тўлиқ англаб етиши ва ёзги тайёргарлик даврида ўзининг яхши томонларини кўрсатишдир.
21 ёшли ҳимоячининг салоҳиятига шубҳа йўқ — “Манчестер Сити” скаутлари бу трансферга катта ишонч билдиришган. Ҳозир асосий муаммо — вақт масаласи. Яқин орада Ҳусанов клубдаги ўз ўрнини топади. Сабаби кўплаб мутахассислар уни Премьер Лигадаги янги юлдузга айланишига ишонмоқда.
Изоҳ (0)