“Манчестер Юнайтед”нинг сотилиши ҳақидаги сериал давом этмоқда. Клубни сотиб олишга асосий даъвогарлар жамоанинг амалдаги раҳбарлари бўлган Глейзерларга учинчи ва охирги таклифни юборди. Аввалига Қатар шайхи Жассим ибн Ҳамад ат-Тани пойга фаворити ҳисобланган бўлса, айни вақтда дунёдаги энг бой британиялик Жим Ретклифф етакчига айланди.
Маълумот учун, Ретклифф трансмиллий кимё компанияси бўлган Ineos ва “Ницца” футбол клубига эгалик қилади, шунингдек, Формула-1 нинг Mercedes жамоасига ҳомийлик қилади. Forbes маълумотларига кўра, унинг бойлиги 2 май ҳолатига кўра, 23,7 миллиард долларни (тахминан 19 миллиард фунт) ташкил қилади.
Ретклифф 69% акцияга даъвогарлик қилмоқда — бу Глейзерларнинг улуши ҳисобланади. Мухлислар қарши, улар жамоанинг тўлиқ сотилишини кутмоқда
Сўнгги таклифдан аввал Sky Sports Ретклифф 50 фоиздан ошиқроқ акцияни сотиб олишни хоҳлаётганини маълум қилганди. Шунда Аврам ва Жоэл Глейзерлар ҳам клубнинг маълум миқдордаги (20 фоиз атрофида) акцияларини сақлаб қолади.
Якуний аукциондан кейин The Times ва The Telegraph нашрлари бошқа маълумот берди. Унга кўра, Ретклифф “Манчестер Юнайтед”нинг 69 фоиз акцияларини, яъни Глейзерларнинг барча улушини сотиб олиш ниятида экани маълум бўлди. Қайд этилишича, у 5 миллиард фунтдан кўпроқ таклиф қилган. Бироз олдинроқ CBS Sports журналисти Бен Жейкобс Қатар шайхи ат-Тани ҳам 5 миллиарддан ортиқ пул таклиф қилгани, фақат у жамоанинг юз фоиз улушини сотиб олишни хоҳлаётгани ҳақида ёзган эди.
Шу билан бирга The Telegraph ва The Times келишувга яқин бўлган инсайдерларига таяниб, Ретклифф 5 миллиард доллардан кўпроқ пул таклиф қилган ягона шахс эканини хабар қилди. Маълумот учун, шу пайтгача ҳеч қайси спорт клубига бундай миқдорда катта пул таклиф қилинмаган. Ҳозиргача спорт оламидаги энг катта келишув америкача футбол жамоаси “Денвер Брокс”нинг 4,65 миллиард долларга (3,75 миллиард фунт) сотилиши бўлган.
Ретклифф Глейзерлар оиласи хоҳлаётган 6 миллиард фунт нархга энг яқин келган даъвогар бўлди ва “қизил иблислар”ни сотиб олиш бўйича пойгада етакчига айланди. “Манчестер Юнайтед” мухлислари эса америкаликларнинг жамоадан тўлиқ кетишини истамоқда. Улар “Астон Вилла”га қарши ўйин олдидан яна бир бор намойиш ўтказди. Асосий талаб қилинаётган нарса — жамоанинг тўлиқ сотилиши.
Иккала потенсиал харидор ҳам иложи борича тезроқ жамоа бошқарувини ўз қўлига олишни истамоқда. Келишувни расмийлаштириш жараёни камида ёзги трансфер ойнаси очилгунга қадар (10 июнь) бориши тахмин қилинмоқда. Шу боис иккала потенсиал харидор ҳам трансферлар ва клубнинг бошқарув ишларига расмий хариддан олдинроқ аралашишни кўзлаяпти. Аммо Глейзерлар катта эҳтимол билан бунга рози бўлмайди.
Ретклифф “Манчестер Юнайтед” мухлиси, бироқ шу пайтгача “Челси” ва “Ньюкасл”ни сотиб олишга ҳаракат қилган
Ретклифф улкан спорт империясининг эгаси (“Ницца” ва “Лозанна” футбол клубларидан елканли спорт жамоаларигача) ва “Манчестер Юнайтед” мухлиси ҳисобланади. Шу билан бирга у аллақачон “Челси”, “Ливерпуль” ва “Ньюкасл” жамоаларини сотиб олишга ҳаракат қилган, бироқ ҳар доим нимадир халал берган.
Миллиардернинг ўзи амалга ошмаган келишувларни қуйидагича изоҳлаган.
Миллиардлар эвазига АПЛ клубини сотиб олиш? Ҳеч қачон пулни бунчалик аҳмоқона сарфламайман. Қайтараман “Манчестер Юнайтед” ва “Челси” 3–4 миллиард фунт туради. Лекин ҳеч ким ҳеч қачон улар учун бунча пул тўламайди. “Юнайтед”га қаранг, уларнинг бизнеси даҳшатли аҳволда. Тўғри бошқарув ҳам, тўғри харидлар ҳам йўқ. Мен ёш иқтидорларни ривожлантиришни хоҳлайман. Менга “Саутҳэмптон” ва “Лилль” модели ёқади. Ineos’да ақлли ёндашув қадрланади, биз пулни беҳуда сарфламаймиз.
“Қизил иблислар” мухлислари жамоанинг амалдаги раҳбарларидан норози. Глейзерлар эса клубни сотиш учун юқори талаблар қўймоқда. “Манчестер Юнайтед”ни сотиб олиш учун курашаётган қатарлик шайх Жассим ибн Ҳамад ат-Тани ва британиялик миллиардер Жим Ретклифф ўртасидаги пойга ҳам қизғин паллага кирмоқда.
Изоҳ (0)