Фарғона вилояти Марғилон шаҳрида 48 ёшли маҳалла раиси вояга етмаган қизга шаҳвоний шилқимлик қилди. Унга суд ҳукми ўқилган.
Суд материалларида келтирилишича, 1977 йилда туғилган I.Р. 7 июнь куни соат 14:00 да ўзи раислик қилиб келаётган Марғилон шаҳар “Хўжа Порсо” МФЙ идораси биносида вояга етмаган 17 ёшли қизга унинг бўйи пастлиги ва бўйни букилиб қолаётганини айтган ва қизнинг хоҳишига зид равишда уни машқ қилдириш баҳонасида белидан ушлаб, икки қўлини елкасига қўйдирган ҳолда оёқларини осилтириб, юзидан ўпмоқчи бўлган.
Раиснинг сўзларига кўра, қиз идорага компьютер хизмати билан боғлиқ ишларда кўмаклашиши учун қабул қилинган. 7 июнь куни қиз бели ва бўйни оғриётганидан шикоят қилгани учун I.Р. хизмат хонасида унга жисмоний машқ қилишни ўргатган. 22 июнь куни эса қизнинг онаси телефон қилиб, фуқарони қизига тегажоғлик қилганликда айблаб, қўпол гапириб, турли уятли сўзлар билан ҳақоратлаган.
Шунингдек, айбланувчи қизнинг бели ва қўлидан бошқа тана аъзосига тегинмаганини қайд этиб, қилган ишининг ҳуқуқий оқибатлари ҳақида ўйлаб кўрмаганини маълум қилган.
Жабрланувчи эса маҳалла раиси I.Р. ўзини меҳрибон қилиб кўрсатиб, бўйни букилиб қолаётгани, олдини олмаса кампирга ўхшаб юришини, бўйи ҳам ўсмаслигини айтиб, турли жисмоний машқларни қилишга ўргатмоқчи бўлганини, бироқ у бунга қаршилик қилган бўлса-да, эркак уни алдаб, қўлини елкасига қўйдириб, оёқларини осилтириб, белидан ушлаб, ортга эгилишига мажбур қилганини таъкидлаган.
Бундан ташқари, қиз машқ ёқмаганини билдирса-да, I.Р. бу машқларни фойдаси тегишини айтиб, ушбу машқни 5−6 марта такрорлаганини, бу орада унинг хонасига қоғоз олиш учун кирганида I.Р. “Юзингда ҳолинг бор экан, шу ерингдан ўпайми?”, деб тегажоғлик қилганини қайд этди.
Суд I.Р.га нисбатан Маъмурий жавобгарлик тўғрисидаги кодекснинг 41−1-моддасида кўрсатилган (шаҳвоний шилқимлик қилиш) ҳуқуқбузарликни содир этган деб топди ва унга нисбатан 4 сутка маъмурий қамоқ жазоси тайинлади.
Изоҳ (0)