Роналдудан Гундўғангача. Премьер Лигага қайтган машҳур футболчилар

Кўпчилик футболчилар АПЛда ўйнашни хоҳлайди. Баъзида Англияда ўйнаб бошқа чемпионатларда ҳам омадини синаб кўргиси келган футболчилар яна футбол ватани ҳавосини соғиниб қайтиб келади.

Масалан, ушбу ёзнинг энг кутилмаган трансферларидан бири шубҳасиз Гундўған бўлди. У “Манчестер Сити”га қайтди. 

Германиялик футболчи АПЛга қайтган биринчи топ футболчи эмас.

Гундўған 2023 йилда “Манчестер Сити” сардори бўлганидан кўп ўтмай “Барселона”га ўтган эди, бироқ Ла Лига клубининг молиявий аҳволи танглиги сабаб немис футболчисини қўйиб юборишга мажбур бўлди ва “Манчестер Сити” уни бундай имкониятни қўлдан бой бермади.

АПЛни тарк этиб яна қайтган машҳур футболчилар билан таништирамиз.

Криштиану Роналду

“Қизил иблислар” томонидан қайтариб олинган Роналдунинг “Олд Траффорд”га қайтиши ижтимоий тармоқларда ижобий қабул қилинди. Роналдунинг “Ньюкасл”га қарши иккинчи ўйинида икки марта гол урганидан кейин бу қувонч каррасига ортди.

Бироқ ишлар режадагидек кетмади. Роналду мунтазам равишда гол урди, аммо жамоани чемпионлик учун курашга илҳомлантира олмади ва 2022 йилнинг ноябрида клубни тарк этди.

Терри Анри

2007 йилнинг ёзида Анрининг “Барселона”га ўтишини ҳеч ким кутмаган эди. Кўпчилик 2006 йилги Чемпионлар Лигаси финалидаги “Арсенал”нинг мағлубиятидан сўнг ҳужумчи бу ҳаракатни амалга оширишини кутган. Бунинг ўрнига у янги шартнома имзолади, аммо барибир бир йил ўтиб кетди.

Охир-оқибат “Ню-Ёрк Red Bullс” жамоасига қўшилган Анри 2012 йилнинг январида икки ойлик ижара асосида MLSдан Шимолий Лондонга қайтди.

Футболчи Премьер Лигага қисқа вақтга қайтди, аммо Англия Кубогида “Лидс Юнайтед”га ва АПЛ доирасида “Сандерленд”га урилган голлар уни муҳим футболчига айлантирди.

Юрген Клинсманн

1994 йили Клинсманн Англияга йўл олганида унга янги мухлисларни меҳрини қозонишдек қийин вазифа турарди. Сабаби футбол оламида у “симулянт” (айёрлик ишлатувчи) футболчи сифатида машҳур эди. Ҳаттоки журналистлардан бири немис футболчисининг Англия ташрифи нега нафрат уйғотиши ҳақида мақола ҳам ёзган.

Бироқ атиги бир мавсумдан сўнг Клинсманн “Бавария”га ўтиш учун Германияга йўл олди.

Икки йилдан сўнг 1997/98 йилги мавсумда “шпорлар”ни қуйи лигага тушиб кетишидан сақлаб қолиш учун ижара асосида АПЛга қайтди.

Дидье Дрогба

Дрогба 2012 йилда Мюнхенда Чемпионлар Лигаси финалида пенальтини аниқ амалга ошириб, “Челси”даги саккиз йиллик фаолиятини ажойиб тарзда якунига етказган эди. Аммо икки йил давомида Хитой ва Туркияда вақт ўтказиб яна АПЛга қайтиб келди. 2014 йилда Кот дъивуарлик форвард шундай деган эди:

“Жозе Моуриньо билан яна ишлаш имкониятини рад эта олмадим. Бу клубга қанчалик меҳрим борлигини ҳамма билади ва у ҳар доим менинг уйим бўлиб келган. Ғалабага бўлган иштиёқим сақланиб қолган ва мен бу жамоага ёрдам беришни интиқлик билан кутяпман. Фаолиятимнинг кейинги босқичини интиқлик билан кутяпман”.

Дрогба бир йил ўтиб Премьер Лига чемпионлигини қўлга киритди ва “Челси”даги фаолиятини якунлади.

Гарет Бэйл

Бэйл 2013 йилда “Тоттенҳэм”ни тарк этиб, “Реал”га ўтганида ўша даврдаги энг қиммат футболчига айланганди. 2020 йилда ижара асосида Англияга қайтганида, унинг ҳисобида Чемпионлар Лигаси ғолиблари учун бериладиган тўртта медал бор эди, аммо Бернабеуда футболчи етарли машҳурликка эриша олмади.

Унинг қайтиши, албатта, муваффақиятсиз бўлмади. Футболчи 34 та ўйинда 16 та гол урди, аммо жамоаси билан соврин юта олмади.

Пол Погба

Погбанинг “Манчестер Юнайтед”га қайтиши турлича қарашлар билан кутиб олинди.

Франциялик футболчи энди “Ювентус”даги каби тез-тез намоён этадиган ажойиб қобилиятларга эга эмас эди. Шу билан бирга, албатта, унинг Англия қайтиши катта хато деб ҳам бўлмайди.

6 йил давомида “Манчестер Юнайтед”да ўйнаган футболчи 154 учрашувда майдонга тушди ва 29 та гол муаллифига айланди.

Николя Анелка

Париждан “Арсенал” клубига кўчиб ўтган футболчи кейинчалик “Реал Мадрид” қўшилади. Шундан кейин яна “ПСЖ” га қайтади. Сўнгра “Ливерпуль”да ижара асосида ўйнаган футболчи “Манчестер Сити” билан шартнома имзолайди.

Уч йилдан сўнг “Фенербахче” билан Туркияга йўл олди ва бир йилдан сўнг “Болтон” билан шартнома имзолади. Бунинг ортидан “Челси”га ўтди. Шундан сўнг у яна Англияни тарк этди, бу сафар Хитойга — “Шанхай Шенхуа” клубига кўчиб ўтди.

Шундан сўнг у Италияда ўйнади ва яна Англияга қайтди. Бу сафар —“Вест Бромвич”га. Бошқа мамлакатлардан Премьер Лигага қайтишлар сони бўйича ҳақиқий афсона. 

Муҳаммад Салоҳ

“Ливерпуль”га ўтганидан сўнг мисрлик футболчи Sky Sports Неwс нашрига шундай деган эди:

“Мен ҳар доим Премьер Лигага қайтишни ва биринчи марта [Chelsida] муваффақиятга эриша олмаганимни айтганларга ҳаммасини исботлашни ўйлардим. Мен ҳар доим АПЛда ўйнаш ҳақида ўйлаганман”.

Икки йил давомида Лондон жамоасида ўйнаган футболчининг ўйини кутилганидек чиқмади. Шундан сўнг футболчи “Фиорентина” ва “Рома” клубларида ўйнади.

2017 йилда “Ливерпуль”га қайтган футболчи ҳозиргача 253 учрашувда 157 та голга муаллифлик қилди ва клубнинг энг яхши ҳужумчисига айланди.

Жо Коул
“Челси”даги ажойиб фаолиятидан сўнг Коул “Ливерпуль”га ўтди, аммо трансфер унинг учун унчалик муваффақиятли бўлмади.

“Ливерпуль” билан бор-йўғи бир йил ўйнагач, у 2011/12 йилги мавсумда “Лилль”га ижарага берилди. Шундан сўнг у “Вест Ҳэм”га қайтди. Кейин эса футболчи “Астон Вилла”да ҳам ўйнади.

Майкл Оуэн

Кўпчилик “Реал Мадрид”га кўчиб ўтган Оуэннинг қобилиятига шубҳа билан қарайди. Аммо футболчи захирадан тушишига қарамай “қироллик клуби”да Ла Лигада 13 та гол уришга муваффақ бўлган.

Испаниядаги муваффақиятсизликка қарамай, 2005 йил ёзги трансфер ойнасида “Ньюкасл”га кўчиб ўтди. Клуб “Олтин тўп” соҳибига катта умид билдирди. Футболчи кейинчалик “Манчестер Юнайтед” ва “Сток Сити” клубларида ўйнаган ва 2013 йилда фаолиятини тугатди.

Жимми Флойд Хасселбанк

Футболчи икки йил давомида “Лидс Юнайтед”да ўйнади. Аммо Жимми янги шартномада жуда катта маош талаб қилди ва айнан шу сабаб билан клубни тарк этди. Футболчи “Атлетико Мадрид”га кўчиб ўтди ва трансферни якунлади ва Испанияда ажойиб мавсум ўтказди ва Ла Лигада 24 та гол урди.

Бу эса “Челси”нинг эътиборини тортди ва Флойд Хасселбанк яна Англияга қайтди. Футболчи “Мидлсбро”, “Чарлтон” ва “Кардифф Сити” клубларида ўйнашдан олдн “аристократлар” сафида 177 учрашувда 87 та гол урди.

Робби Кин

Кин “Ковентри Сити” сафида Премьер Лигада бор-йўғи бир мавсум ўйнади ва “Интер”га ўтиб, Марчело Липпи қўл остида ўйнади. Аммо Липпининг ўрнига Марко Тарделли келиши билан унинг “Сан-Сиро”даги муваффақиятли фаолияти якунига етди. Янги мураббий қўл остида бор-йўғи 14 та ўйин ўтказган ирландиялик футболчи Англияга “Лидс Юнайтед”га қайтиб келди. Аввалига ижарага келган футболчи 2001 йилнинг май ойида Англияга тўлиқ кўчиб ўтди. Ирландия термасининг собиқ футболчиси “Ливерпуль”, “Вест Хем” ва “Астон Вилла” клубларида ҳам тўп сурган, бироқ “Тоттенҳэм”даги фаолияти билан эсда қолган.

Эркин Ғайбуллаев таржимаси