Клаудио Ранерининг “Рома”га бош мураббий сифатида келиши клуб учун унутилмас давр бўлди. Куз фаслидан бери жамоани бошқариб келаётган тажрибали мутахассис қисқа фурсатда “бўрилар” ўйинига ижобий таъсир кўрсатди. Сўнгги икки ой ичида кўрсатилган юқори даражадаги футболи туфайли эндиликда “Рома” яна Еврокубоклар йўлланмаси учун курашмоқда.
Аммо Пауло Дибаланинг олган жароҳати фонида, кўпчилик футбол ишқибозлари клубнинг кучли еттиликка кира олишига шубҳа билан қарамоқда. Шунга қарамай, римликлар ҳозирда эътиборини ёзги трансферлар ойнасига қаратмоқда. Мақсад — таркибни кучайтириб, кейинги мавсумларда Чемпионлар Лигаси йўлланмаси учун мунтазам кураша оладиган даражага чиқиш. Режаларнинг кўпи А Серия якунига боғлиқ бўлади. Аммо “Рома” айнан қандай футболчиларни ўз сафига қўшишни режалаштиряпти? Ҳозир шу борасида бир оз тўхталишга қарор қилдик.
Марказий ҳимоячи
Матс Ҳуммелснинг клуб билан шартномаси якунланаётган бир пайтда, “Рома” марказий ҳимояни кучайтиришни режалаштиряпти. Клуб раҳбарияти эътиборини тортган номзодлардан бири — “ПСВ” ҳимоячиси Оливье Боскали.
27 ёшли франциялик ҳимоячи бу мавсумда Нидерландия чемпионатида 23 ўйинда майдонга тушди ва Чемпионлар Лигасида 10 та баҳсда қатнашди. Боскали жорий мавсум яхши ўйин намойиш этмоқда, хусусан у ҳаводаги курашларда ўртача 1,3 марта ғалаба қозонган бўлса, тўп узатишдаги аниқлик 88,6 фоизни ташкил қилмоқда. Оливье мазкур жиҳатлари билан “Рома” ҳимоясига катта фойда келтириши мумкин. Шу боис клуб раҳбарияти футболчини ўз сафига қўшиб олиш учун ҳаракат бошлаган.
Чап қанот ҳужумчиси
“Рома” сафида узоқ йиллардан бери ҳаракат қилаётган Стефан Эл-Шарави ҳали клуб билан янги шартнома борасида келишиб олгани йўқ. Шу сабабли, римликлар чап қанотга янги вингер изламоқда. Ҳозирги пайтда эҳтимолий трансфер сифатида “Бавария” футболчиси Лерой Сане номзоди кўриб чиқилмоқда.
Германиялик футболчи жорий мавсум Бундеслигада 22 ўйинда иштирок этиб, 7 та гол киритган ҳамда 4 та ассист қайд этган. Чемпионлар Лигасида эса 4 та баҳсда 1 марта рақиб дарвозасини ишғол қилди. Сане 2026 йил январида 30 ёшга тўлади. “Бавария” ёш футболчиларга эътибор қаратмоқда. Шунинг учун, унинг мюнхенликлар сафидаги келажаги мавҳум бўлиб турибди. “Рома” Чемпионлар Лигаси йўлланмасини қўлга киритса, унинг хизматларига даъвогарлар рўйхатидан жой олиши хабар қилинган. Эҳтимол футболчи ҳам бу таклифни рад этмаслиги мумкин.
Ўнг қанот ҳужумчиси
Ёзда “Рома” ўнг қанотга ҳам футболчи олиб келишни режалаштиряпти. Ҳозирда “Челси”да ижара асосида ўйнаётган Жейдон Санчо “бўрилар”нинг “радарида” бўлиб турибди. Рим клуби “Манчестер Юнайтед”да омадсизликка учраган инглиз футболчиси учун янги саҳифа очиб бериши мумкин.
Санчo бу мавсум “Челси”да ўртача мавсум ўтказди. У клуб сафида 39 ўйинда иштирок этиб, ўз ҳисобига 4 та гол ва 10 та голли узатма ёздириб қўйган. Аммо “аристократлар” уни тўлиқ сотиб олишдан бош тортгани айтилмоқда. Санчо “Юнайтед”дагилар билан жанжали сабаб клубдан кетиши кутилмоқда. “Рома” эса унинг тезлигидан фойдаланган ҳолда ўнг қанотни кучайтириши мумкин.
Таянч ярим ҳимоячи
“Рома” ярим ҳимоянинг орқа чизиғини ҳам кучайтириш ҳақида ўйламоқда. Ҳозир бу жойда Ману Коне ва Леандро Паредес асосий ролларни бажармоқда. Бироқ Паредеснинг ёши ўтиб бораётгани ва шартномасининг тугашига бир йил қолганини инобатга олиб, клуб янги номзод излаяпти.
Бу борада “Арсенал” футболчиси Томас Парти клуб учун мос вариант сифатида кўринмоқда. Гана терма жамоаси аъзоси бу мавсумда Англия Премьер Лигасида 28 та ўйинда иштирок этиб, 5 голда иштирок этди. Унинг ҳар бир учрашувдаги ўртача узатма аниқлиги 88,8 фоизни ташкил қилмоқда.
Ҳужумчи
Европадаги деярли барча жамоалар каби, “Рома” ҳам ҳужум чизиғини кучайтиришга ҳаракат қилмоқда. Айниқса, Пауло Дибаланинг жароҳати фонида бу эҳтиёж янада кучайган.
Ҳозирча асосий ҳужумчи сифатида Артём Довбик ва Элдор Шомуродов ҳисобланади. Бироқ жамоа уларга рақобатчи олиб келишни истамоқда. Шунингдек, ОАВда украиналик футболчи собиқ клуби “Жирона”га қайтиши мумкинлиги борасида миш-мишлар тарқалган. Шунинг учун римликлар эҳтимолий трансфер сифатида бир нечта ҳужумчиларни “шорт-листи”га қўшиб қўйибди. Бу борада “Эвертон” футболчиси Доминик Калверт-Люин вариант сифатида кўрилмоқда. 28 ёшли ҳужумчи бу мавсум АПЛда 19 ўйинда қатнашиб, 3 гол урган бўлса-да, янги муҳитда ўзини тиклаши мумкинлиги айтилмоқда. Шунингдек, унинг трансфер суммаси ҳам клуб учун қулай бўлиши мумкин. У “Рома” учун бюджетга мос ва фойдали трансфер бўлиши тахмин қилинмоқда.
Изоҳ (0)