“Манчестер Сити” бош мураббийи Пеп Гвардиола “Тоттенҳэм”га қарши баҳс олдидан ўтказилган матбуот анжуманида қишки трансфер ойнаси пайти жамоага қўшилган футболчиларнинг ўйинига баҳо берди.
“Улар машғулотларда жуда яхши ҳаракат қилмоқда. Ҳусанов “Челси”, “Лейтон Ориэнт”, “Ньюкасл”, “Реал” ва “Ливерпуль”га қарши ўйинларда майдонга тушди. У жамоага қийин пайтда келиб қўшилди. Абдуқодирни Франциянинг ўртамиёна клубидан келганини ҳисобга олсак, ўйинлар жадвали тиғиз экани унга қийинчилик туғдирган бўлиши мумкин.
Ҳусанов ҳали инглиз тилида эркин гаплаша олмагани сабабли баъзи муаммоларга дуч келди. Биз унга инглиз тилини тезроқ ўрганишга ундаяпмиз, сабаби мулоқот жуда муҳим. Унинг оғир-босиқлигидан келиб чиқсак, инглиз тилини яхши билганда ҳам Ҳусанов билан кўп гаплашамиз деб ўйламайман. Бироқ шуни таъкидлаш керакки, унинг жамоага қўшган ҳиссаси катта бўлди.
Омар Мармуш ва Нико Гонсалес эса камроқ ўйин амалиётига эга бўлишмоқда, аммо улар ҳам ўзларини яхши кўрсатишди. Биз улар ўтказаётган ўйинларидан мамнунмиз. Vitoр Рейс эса ўйин амалиётига эга бўлгач, олдингиданда юқори савияда ўйнашига ишонамиз”, дея Гвардиоланинг сўзларини келтиради Citi Хtrа нашри.
Эслатиб ўтамиз, бугун, 26 февралдан 27 февралга ўтар кечаси “Манчестер Сити” — “Тоттенҳэм” учрашуви бўлиб ўтади. Учрашув Тошкент вақти билан 00:30 да бошланади. Ҳозирда “шаҳарликлар” АПЛ турнир жадвалида 26 турдан кейин 44 очко тўплаб 5-ўринда бормоқда. Лондон клуби 33 очко билан 13-ўринни банд этган.
Изоҳ (0)