Transfermarkt портали Италия А Сериясидаги футболчиларнинг трансфер қийматларини янгилади. Унга кўра, Ўзбекистон терма жамоаси ва Римнинг “Рома” клуби ҳужумчиси Элдор Шомуродов 1 миллион еврога қимматлашиб, 5 миллион еврога баҳоланмоқда.
Transfermarkt портали бунга қуйидагича изоҳ берди:
Бу ўсиш асосан мураббийлар штабининг Шомуродовга бўлган ишончини тиклагани ва Элдорнинг бу имкониятдан унумли фойдалангани билан боғлиқ. Шунга қарамай, А Серияда 29–32 ёш тоифасидаги футболчилар орасида фақат Ромелу Лукаку ундан юқорироқ нархга баҳолангани эътиборга молик жиҳат, дейилади Transfermarkt порталида.
Шомуродов ҳозирда “Рома”даги энг қиммат 19-футболчи ҳисобланади. Шунингдек, у ўзбекистонлик футболчилар орасида 3-ўринда турибди. Ундан юқорироқ поғоналарда Абдуқодир Ҳусанов (35 миллион евро) ва Аббосбек Файзуллаев (8 миллион евро) қайд этилган.
Маълумот учун, Шомуродов якунланган мавсумда “Рома”нинг барча мусобақалар доирасидаги 37 ўйинида майдонга тушиб, 7 та гол ва 5 та голли узатмага муаллифлик қилган. Унинг клуб билан шартномаси 2026 йил июнь ойигача амал қилади.
Изоҳ (0)