Италия А Сериясининг 2022/23 йилги мавсумига йўлланмани қўлга киритган «Монца» клуби Элдор Шомуродовга қизиқиш билдирмоқда, дея хабар қилмоқда Италиянинг қатор нашрлари.
«Монца» спорт директори Филиппо Антонелли Агомери мазкур хабарлар юзасидан берилган саволга изоҳ бериб ўтди.
«Шомуродов кучли футболчи, у бизга ёқади. Бироқ ҳозирча шуни айта оламиз», — деган Агомери «Чемпионат» билан бўлган суҳбатда.
Аввалроқ Элдор Шомуродов «Рома»нинг Исроилдаги йиғинига олиб кетилмагани ва римликлар сафини тарк этишга яқин тургани хабар қилинганди. 27 ёшли футболчига «Торино» ва «Болонья» клублари қизиқиш билдираётгани маълум қилинганди.
Шомуродов 2021 йилнинг ёзги трансфер ойнасида 18 миллион евро эвазига «Женоа»дан «Рома»га ўтганди. У «бўрилар»сафида жами 40 та ўйин ўтказиб, бешта гол ва олтита голли узатма амалга оширди.
Италиянинг собиқ бош вазири ва «Милан»нинг собиқ раҳбари Силвио Берлусконига тегишли жамоа 2021/22 йилги мавсум якунларига кўра, Италиянинг юқори дивизионига йўлланмани қўлга киритди.
Изоҳ (0)