Европада бугун қишки трансфер ойнаси ёпилди. Сўнгги кунда содир бўлган трансферлар битта саҳифада

Европанинг қатор лигаларида 31 январь куни қишки трансфер ойнаси ёпилди. Қуйида дедлайн куни юз берган асосий трансферлар тақдим этилган.

• “Манчестер Юнайтед” Марсель Забицерни “Бавария”дан ижарага олди. Келишувда футболчини сотиб олиш ҳуқуқи ҳақидаги банд йўқ.
• “Тоттенҳэм” “Порту” вакили Педро Поррони 45 миллион еврога сотиб олиш мажбурияти билан ижарага олди. Ижара лимитини бузмаслик учун “шпорлар” Метт Доэрти билан шартномани бекор қилди. Ирландиялик футболчи “Атлетико” сафида йўл олди ва “матрасчилар” билан жорий мавсум якунига қадар мўлжалланган битим имзолади.

• 2018 йилдан буён “Челси” шарафини ҳимоя қилиб келган Жоржиньо “Арсенал” сафига ўтди. Италиялик футболчи “канонирлар” билан 2024 йилга қадар мўлжалланган шартнома имзолади. Шунингдек, битимда уни бир йилга узайтириш ҳуқуқи ҳам бор. 31 ёшли ярим ҳимоячи “Арсенал”да 20-рақам остида тўп суради.  
• Ҳарис Сеферович “Галатасарой”дан “Сельта”га ўтди. Испан клуби футболчини ижарага олди. 

• “Боруссия Д” шарафини ҳимоя қилган белгиялик Торган Азар фаолиятини “ПСВ”да давом эттиради.

• Трево Чалоба “Фулҳэм”дан “Вест Бромвич” сафига ўтди. 
• “Бетис” “Лестер” футболчиси Аёсе Пересни ижарага олганини эълон қилди. 
• “Лидс” футболчиси Диего Льоренте “Рома”га ижара асосида ўтди. Испаниялик футболчи Элдор Шомуродов тўп сурган 14-рақамни қабул қилиб олди. 
• “Бавария” “Манчестер Сити” ҳимоячиси Жоау Канселуни ижарага олганини эълон қилди. Myунхенликларда футболчини 70 миллион евро эвазига сотиб олиши ҳуқуқи ҳам бор. Жоау немис клубида 22-рақам остида ҳаракат қилади.
• “Тоттенҳэм” вакили Брайан Хил “Севилья”га қайтди. Испан клуби 21 ёшли футболчини мавсум охиригача ижарага олди. Хил андалусияликлар академияси 12 йил давомида ҳаракат қилган. 2021 йилда “Севилья” футболчини Эрик Ламела ва 25 миллион евро эвазига “шпорлар” сафига қўйиб юборганди.

• “Ювентус” ярим ҳимоячиси Уэстон Маккенни “Лидс” сафига ўтди. АПЛ клуби америкалик футболчини сотиб олиш ҳуқуқи билан мавсум охиригача ижарага олди. 24 ёшли футболчи янги жамоаси 28-рақам остида ҳаракат қилади.
• “Арсенал”нинг 19 ёшли ҳужумчиси Маркиньос Оливейра ижара асосида “Норвич”га йўл олди. Бразилиялик футболчи мавсум охиригача “Норвич” либосини ҳимоя қилади.
• “Сельта” футболчиси Денис Суарес ижара асосида “Эспаньол” сафига ўтди. Испаниялик ярим ҳимоячи мавсум охирига қадар каталонияликлар шарафини ҳимоя қилади. 

• “Ньюкасл” “Вест Ҳэм”нинг 21 ёшли футболчиси Ҳаррисон Эшби билан узоқ йиллик шартнома имзолади. Футболчининг трансфер нархи очиқланмаган. 
• Франциялик футболчи Флориан Товен “Тигрес” сафидан “Удинезе”га ўтди. Футболчи А Серия клуби билан 2025 йил 30 июнга қадар мўлжалланган шартнома имзолади. 
• “Челси”нинг 19 ёшли футболчиси Жуда Сунсап-Бел “Тоттенҳэм” билан 2025 йилгача битим тузди. Жуда “шпорлар”нинг ёшлар жамоасида тўп суради.